Алим, шаир Алкьвадар Гьасан эфендидин хтул, шейх Мегьамед Ярагъвидин штул, Готфрид Алиевич Гьасанов дидедиз хьайидалай инихъ 125 йис тамам хьунин лишандик кваз, Дагъустанда ва адалай къецени адан уьмуьрдиз ва яратмишунриз талукьарнавай хейлин мярекатар кьиле фена.
И йикъара Дербентдин 1-нумрадин музыкадин мектебдин концертрин залда «Диалог культур: междисциплинарный подход» проектдин сад лагьай паюнин нетижаяр кьуна.
2020-йисалай кардик квай и проектдин сад лагьай паюна, «Ленинграддин консерватория акьалтIарай регионрин композиторар» программадин сергьятра аваз, алай йисуз тешкилай илимдинни тарихдин ахтармишунар бажарагълу композитор, критик ва публицист, жемиятдин деятель, Дагъустанда пешекарвилин музыкадин бине эцигай ва ам вилик тухвай Готфрид Гьасановаз бахшнавай.
И проектдин тешкилатчи Санкт-Петербургдин музыкадинни рекъемрин технологийрин хиляй пешекаррин ассоциациядин президент, Россиядин композиторрин союздин член, РД-дин культурадин лайихлу къуллугъчи Андрей Михайлович Коваленко я.
И мярекатда Санкт-Петербургдай, Москвадин областдай хтанвай мугьманри, Дербент шегьердин ва райондин музыкадин мектебрин муаллимрини аялри, художник Мелик Агъабалаева, мярекат тухуник къуьн кутур Мурад Гьажиханова, и цIарарин авторди ва масабуру иштиракна.
Анал А. Коваленко, М. Хайиров ва масабур Г. Гьасанован яратмишунрикай, ада тунвай музыкадинни культурадин ирсинин метлебдин важиблувиликай куьрелди рахана.
КIватI хьанвайбур Г. Гьасанован яратмишунриз талукьарна кьиле фейи международный ва Вирироссиядин илимдинни тежрибадин конференцийрал машгьур музыковедри адан гужлу зигьиндикай лагьанвай фикирар кIватIнавай, ада кIвалахай ва ам хьайи чкайрикай чIугунвай видеофильмдиз еке итиж аваз килигна.
Мярекат акьалтIарайдалай гуьгъуьниз Г. Гьасанован яратмишунриз талукьарна. Дагъустанда кьиле фейи мярекатрикай абур тешкилиз ва тухуз куьмек гайи Дербентдин аялрин музыкадин 1-нумрадин мектебдин директор, композитор, РД-дин искусствойрин лайихлу деятель Мавлудин Хаирововай суьгьбетун тIалабна.
— Готфрид Гьасанов 1900-йисуз Дербент шегьерда къуллугъчидин хизанда дидедиз хьана, Дагъустанда музыкадин бине эцигайди хьиз, ада гьакI музыкадин коллективар ва идараяр арадал гъана, абуруз регьбервал авуна, музыкадин фольклор кIватIна, ахтармишна. Дагъустанда гьакъикъи цIийи музыкадин искусство, культура арадал гъунин карда композиторди лап важиблу роль къугъвана, — къейдна ада.
— Алай йисан апрелдин вацра Махачкъаладин музыкадин училищеда кьиле фейи республикадин III лагьай олимпиадада чи мектебдин ученица Зулейха Магьмудовади иштиракна. Ада Готфрид Гьасанован уьмуьрдикай ва яратмишунрикай гьазурна къалурай чIехи кIвалахдиз пешекаррин жюриди лап виниз тир къимет гана, ам сад лагьай дережадин дипломдиз ва къиметлу пишкешриз лайихлу хьана.
Ада вичин кIвалахда адетдин материалрикай менфят къачунилай гъейри, музыкадин рекъемрин технологиярни ишлемишна. Вичин презентацияда ада эвела вичи тамамарай Г. Гьасанован эсерарни ишлемишна. Эхирдай ада Г. Гьасанован 18-нумрадин прелюдия тамамарна.
24-апрелдиз, Готфрид Алиевич дидедиз хьайидалай инихъ 125 йис тамам хьуниз талукьарна, Санкт-Петербургда кьиле фейи Вирироссиядин «Гасановские чтения» конференцияда чи аялри онлайн къайдада иштиракна. Яни аниз чна абурун тIалабуналди чи аялри тамамарзавай композитордин эсерар, видеокамерадиз чIугуна, ракъурна.
Майдин суварин вилик шегьердин гамаринни декоративно-прикладной искусстводин музейда Г. Гьасанован юбилейдиз талукьарна кьиле фейи концертда музучилищедин ва чи мектебдин муаллимрихъ галаз санал студентрини аялри активнидаказ иштиракна. Музейда кIватI хьанвай чкадин агьалийрини туристри Ш. Гьусейновади, З. Магьмудовади, Р. Мирзаметова ва Н. Мирзоевади фортепианодал тамамарай пьесайриз, Л. Сефибеговади тамамарай композитордин лирикадин пьесадиз ва прелюдияйриз дикъетдивди яб гана.
Мярекатдиз атанвай Алкьвадар Гьасан эфендидин музейдин директор Гь. Гьусейнова, музучилищедин директор К. Магьмудовади ва и цIарарин авторди тешкилатчийриз ва иштиракчийриз рикIин сидкьидай сагърай лагьана.
20-майдиз шегьердин кьилин библиотекада кьиле фейи эдебиятдинни музыкадин мярекатда чи мектебда чирвилер къачузвай аялрини иштиракна.
Кьилди къачуртIа, абуру композитордин 8 ва 18-нумрайрин прелюдияр ва лирикадин 4-нумрадин пьеса устадвилелди тамамарна.
Мярекатда иштиракай вири аялризни муаллимриз сертификатарни къиметлу пишкешар гана.
Къагьриман Ибрагьимов
