28-февралдиз Махачкъалада, Шииратдин театрдин дараматда, Дагъустандин жемиятдинни сиясатдин машгьур деятель, журналист, РД-дин Халкьдин Собранидин депутат Ильман Субгьанович Алипулатован экуь къамат рикIел хкуниз талукьарнавай мярекат кьиле фена.

И.Алипулатов 1954-йисан 28-февралдиз Докъузпара­ райондин Гарагърин хуьре дидедиз хьана. Адал чан ала­майтIа, мукьва-кьилийри, ярар-дустари цIи адан 70 йисан­ юбилей къейддай. Ам 2022-йисан ноябрдин вацра рагьметдиз фена.

Мярекатдиз Ильман Алипулатовахъ галаз санал кIва­лахай юлдашар, алимар, РД-дин Халкьдин Собранидин депутатар, журналистар, адан студентар ва масабур атанвай. Кьилди къачуртIа, абурун арада РД-дин Халкьдин Собранидин Председателдин заместитель Камил Давдиев, РД-дин информациядин ва печатдин Агентстводин руководителдин сад лагьай заместитель Наида Мегьамедова, экономикадин илимрин доктор Зиявудин Пулатов, ДГАУ-дин ректор Зайдин Жамбулатов, республикадин образованидин центрадин директор Анжела Байрамбегова ва масабур авай.

Мярекат телевиденидин режиссер Давид Кумаева И.Али­пулатовакай гьазурнавай фильмдиз килигунилай га­тIун­на. РикIел хкин, И.Алипулатова яргъал йисара «Дагъус­тан» ГТРК-да «Акценты» программа кьиле тухвана, ДГУ-да филологиядин факультетдин электронный СМИ-рин заведующийдин везифаяр тамамарна, политологиядай, СМИ-риз талукь месэлайрай монографияр кхьена. Адан уьмуьрдин и ва маса терефрикай фильмда гегьеншдиз раханва.

Мярекатдал рахай «Дагъустан» ГТРК-дин генеральный директор Луиза Алихановади, РФ-дин журналистрин Союздин Дагъустандин отделенидин председатель Мегьамед Ибрагьимова, журналист Салам Хавчаева, Дагъустандин эдебиятдин журналрин кьилин редактор Мурад Агьмедова, ДГУ-дин филологиядин факультетдин муаллим Динара Керимовади ва масабуру Ильман Алипулатован къени ерийрикай ихтилатна, адахъ галаз алакъалу бязи легьзеяр рикIел хкана.

Чи мухбир