5-мартдиз Махачкъалада РД-дин Гьукуматдин Председатель Абдулмуслим Абдулмуслимован регьбервилик кваз Дагъустанда промышленностдин суьрсет къанунсуздаказ маса гунин вилик пад кьунин жигьетдай кардик квай комиссиядин заседание кьиле фена. Анал веревирд авур асул месэлайрикай сад республикадин образованидин, яшайишдин, медицинадин идарайриз агакьарзавай суьрсетдин еридиз талукьди тир.
РикIел хкин, гьеле 2022-йисуз РД-дин Гьукуматдин Председателдин тапшуругъдалди Дагъустанда гьасилзавай суьрсет патал махсус лишан арадал гъанай. Идалай кьулухъ государстводин ва муниципалитетра авай умуми образованидин идарайрин кьилевайбуруз, суьрсет маса къачудайла, жезмай кьван «Дагъустандин суьрсет» лишан алайди маса къачун теклифнай.
2024-йисан 9-февралдин делилралди, республикада авай умуми образованидин 1403 идарадикай 658-да — «Дагъустандин суьрсет» лишан алай, 806-да — Дагъустандин производителри акъудзавай ва 264-да республикадилай къецепатай суьрсет маса къачузва.
А.Абдулмуслимова хабар гайивал, Дагъустандиз къецепатай къалп (фальсифицированный) суьрсет гъун давам жезва. Адак некIедин суьрсетни акатзава. РД-дин Роспотребнадзордин Управлениди кьиле тухванвай ахтармишунрай аквазвайвал, еридиз усал суьрсет асул гьисабдай образованидин идарайрив агакьзава. Мисал яз, 2023-2024-кIелунин йисуз республикадин 35 муниципалитетда образованидин идарайрив еридиз усал некIедин суьрсет агакьай 68 дуьшуьш винел акъуднава. Премьер-министрди шаз региондин мектебривни аялрин бахчайрив саки 12 агъзур тонн еридиз усал чIем агакьайдини рикIел хкана.
Вири и крар фикирда кьуна, А.Абдулмуслимова талукь идарайрал Дагъустандин мектебризни аялрин бахчайриз агакьзавай суьрсетдин еридал тухузвай гуьзчивал артухарун тапшурмишна.
«Ихьтин нагьакьан, чи аялрин сагъламвилиз зиян авай гьерекатрин вилик пад кьун патал вири серенжемар кьабулна кIанда: суьрсетдин еридал гуьзчивал тухун, гьахьтин суьрсет маса гузвайбурун махсус сиягь гьазурун ва икI мад», — лагьана ада.
Чи мухбир
