Къияс Межидован — 110 йис
2021-йисан 21-мартдиз Ахцегьа, Дагъустандин халкьдин писатель Къияс Межидован 110 йис тамам хьуниз талукь гурлу мярекатар кьиле тухвана. Писателдин мукьва-кьилиярни яратмишунрал рикI алай ксар, кьиле муниципалитетдин регьбердин заместитель Вадим Агъасиев аваз, райондин интеллигенция, райцентрадин школайрин ва писателдин тIварунихъ галай аялрин яратмишунрин КIвалин (ДДТ) тербиячияр, гъилера цуьквер аваз, Къияс Межидован кIвализ-усадьбадиз кIватI хьана. Ана абур юбилярдин хва Марата ва адан хизанди хушдиз къаршиламишна. Къияс Межидован яратмишунин кIвалихъ-кабинетдихъ галаз таниш хьана (ина зегьметдин стол, интерьер гьа авайвал тунва), шикилар яна, аялри юбилярдин шиирар кIелна, савкьатар яз, адан ктабар къачуна, мярекатдин иштиракчийрин десте писателдин сурал цуьквер эцигиз фена.
Хайи тIебиатдал, инсанрал ашукь Къиясан сурни адетдинди туш. Анал писателди вичел чан аламаз гьазурнавай гуьзел къаматдин гуьмбет-памятник ала. Писателдин гъилин меквяй нуькIре яд хъвазва. ИкI ада кечмиш хьайидалай кьулухъни гуя тIебиатдиз къуллугъзава, ам хуьзва. Писателдин дуст ва ученик, Дагъустандин культурадин лайихлу работник, шаир ва муъмин инсан Гьемдуллагь Бабаева гуьмбет арадал атуникай суьгьбетна, рагьметлудан весидин тегьердин шиир кIелна.
Веси я зи руьгьдин буйругъ,
РикI тазва за квез уьмуьрлух,
Къушаризни ая къуллугъ,
Абур сугъул тахьуй завай!
КIвализ мугьман хьайила яр-дуст,
Акурай зи гуьмбет-бюст,
Къушарини яд хъваз меквяй,
Атурай гьакI лув гуз цавай!
Къиясан руьгьдихъ пак Кьуръандин сураяр кIелна, вирибуру дуьа авурдалай кьулухъ кIватI хьанвайбур Ахцегьрин тарихдин музей галайвал ахмиш жезва. Ина писателдин 110 йисан юбилейдиз талукь девлетлу выставка-экспозиция ачухнавай. Ана писателдин яратмишунрин гурлу рехъ къалурзавай, тамашуниз лайихлу пара шейэр ава: хсуси парталар, гъилин хатIаринни ктабрин стенд, шикилар… Музейдин директор, РД-дин культурадин лайихлу работник Агьмед Дагъларова абурукай гьевесдивди суьгьбетна.
Сятдин цIикьвед. Райбиблиотекадин кIелдайбурун зал Къияс Межидован юбилейдин мярекатдиз атанвайбурув сиве-сивди ацIанва. Вирибурун вилик юбилярдикай туькIуьрнавай махсус буклетар, чай, ширнияр, афарар ква. Сифте гаф рахуналди ва кIватI хьанвайбуруз Яран сувар мубаракуналди, мярекат райондин культурадин управленидин начальник Къистер Гъаниевади ачухна ва ам давамарун вичин куьмекчи Сулейман Сулеймановал тапшурмишна.
Писателдин уьмуьрдинни яратмишунрин рекьикай вичин итижлу суьгьбетдин арайра ада мярекатдин иштиракчийриз рахун патал гаф гузва. Рахунрин арайра РДК-дин гьевескар артистри (Цуьквер Мамедовади, Рубаба Къурбановади, Фаргьад Гьашумова, Эмирсултан Бигеева, Гьажи Агъаева, Саид Эскерханова) чпин манийралдини кьуьлералди, гьакI Къ. Межидован «Урусатдин цуьк» тамашадай сегьне къалуруналди ва аялри шиирар кIелуналди мярекат мадни къешенг ва маналу ийизва.
Вадим Агъасиева вичин ва райондин кьил Осман Абдулкеримован патай милли литературадин мярекат ва Яран сувар мубаракна, адан тешкилатчийризни иштиракчийриз ва патарай хтанвай писателдин багърийриз чухсагъул лагьана.
“Ахцегьар бажарагълу ксаралди девлетлу я. Чпин юбилейрин мярекатар тухуналди чна, якъин, абурун чешнейралди жегьилар дуьз тербияламишзава. Къияс Межидован “Зи гъвечIи дустариз”, “Лувар квай дустар”, “Дагъдин аялар”, “КIвачерик лувар квай Алуш” ва маса ктабрай аквазвайвал, адаз тIебиат, аялар пара кIандай. И темаяр гьакьван рикI алаз ачухарнавай маса писатель лезги литературада чаз чидач”, — алава хъувуна В.Агъасиева.
Мярекатдал гьакI лезги писателрин Союздин председатель Максим Алимов, гьевескар шаирар тир Жамиля Гьажиева, Севинжи Муртазалиева, Асият Рагьимова, зегьметдин ветеранар — Нариман Гьажиев, Къардаш Мамалиев, Руслан Касаров, Симаханум Гьажиева, Гьемдуллагь Бабаев, Агьмед Дагъларов, райондин дишегьлийрин советдин председатель Таира Муспагьова, писателдин тIвар алай хтул Къияс Межидов, и цIарарин автор ва пара масабур рахана. Эхирдай Къиясан хва, зегьметдин ветеран Марат Межидова вичин бубадин гьуьрметдай ва ам эбеди рикIера хуьнин лишан яз ихьтин шад ва гурлу мярекатдик кьил кутур ва ана иштиракай вирибуруз рикIин сидкьидай чухсагъул малумарна.
Дашдемир Шерифалиев
