Алатай гьафтеда Дагъустанда къати марфар къунин нетижада са жерге шегьерра, районра акьалтIай четин гьалар арадал атана: рекьер-муькъвер кардикай хкатна, яшайишдин кIвалериз, майишатриз зиянар хьана, агъзурралди агьалияр эквер, яд авачиз амукьна.
Ихьтин гьалар, энгел тавуна, арадай акъудун патал махсус къуллугъри югъди-йифди кIвалахзавай. «Дагэнергодин» энергетикри къайдадикай хкатнавай вири энергообъектар кардик кухтуна. И кIвалахрал пешекаррин 60 бригада желбнавай.
Агьалияр хъвадай целди таъминар хъувунин кIвалахра Сад тир оператордин, МЧС-дин векилри иштиракна. «Приморская» подстанция цик акатунихъ ва КОР-да цин дережа агъуз аватунихъ галаз алакъалу яз, кьакьан гьавайрин хейлин кIвалер цикай магьрум хьанвай. Исятда и месэла гьялна акьалтIарнава.
Сергей Меликова къати марфарин чIуру нетижаяр вахтунда арадай акъудун патал зегьмет чIугур министерствойрин, ведомствойрин, махсус къуллугърин векилриз сагърай лагьана.
Агьмед Магьмудов
