Чимивал гуниз гьазурвиликай
РД-дин госжилинспекцияда (ГЖИ) шегьерарни районар 2025-2026-йисарин чимивилелди таъминардай муддатдиз гьазур хьуниз талукьарнавай совещание кьиле фена. Мярекатда шегьеррин округрин кьилери ва ЖКХ-дин хел идара ийизвай абурун заместителри иштиракна. Совещанидал муниципалитетар зулунни хъуьтIуьн муддатдиз гьазур хьунин гьалдикай баянар гана. Санлай къачурла, и жигьетдай чешмеди гъизвай делилар ихьтинбур я:
Махачкъала — 77 процент;
Каспийск — 59 процент;
Дербент — 78 процент;
Дагъустандин Огни — 59 процент;
Избербаш — 84 процент;
Буйнакск — 66 процент;
Къизилюрт — 80 процент;
Къизляр — 61 процент;
Хасавюрт — 35 процент;
Кьиблепатан-Сухокумск — 50 процент.
Гьа са вахтунда хабар гузвайвал, Дагъустан чимивилелди таъминардай муддатдиз гьазур хьун 71 процентдиз барабар я.
Раижзавайвал, РД-дин ГЖИ-ди региондин ЖКХ-дин вири субъектар тамамдиз гьазур хьунал кIевелай гуьзчивал кьиле тухузва. Совещанидал комплекснидаказ къимет гун кьиле тухунин вахтар ва регламент бегьемдиз веревирдна. Къейдзавайвал, ихьтин къимет гун махсус комиссийри кьиле тухузва. ГьакIни мярекатдал чимивилелди таъминардай муддат хкатунар галачирди ва къулайди хьун таъминарун патал вири этапар вахтундамаз ва ерилудаказ кьилиз акъудун важиблу тирди къейдна.
ЦIийи мумкинвал
Дагъустандин дачайрин сагьибривай ва поселокрин агьалийривай гила неинки участокдал пулсуз газ тухуз, гьакIни арада мензил аваз (виртуально) арзани вугуз жеда. Идакай, «Газпром межрегионгаз Махачкала» тешкилатдал асаслу яз, «Лезги газетдин» сайтда хабар гузва.
Чешмеди рикIел хкизвайвал, пулсуз яшайишдин газификация — им газдалди таъминарнавай агьалияр яшамиш жезвай чкайра участокрал алай кIвалерин сергьятрал кьван газ тухун я. Идалайни гъейри, вичикай ихтилат физвай программадик азарханаяр ва яшайишдин идараярни акатзава. Къейдзавйвал, чарасуз мад кьве шартI ава: яшайишдин газификациядин патахъай арза ганвай участок хсусият хьун патал туькIуьрна кIанда, адал капитальный кIвални хьун лазим я.
«Газпром межрегионгаз Махачкала» тешкилатдин газовикрин гафаралди, арза онлайн режимда «Госкъуллгуъар» ва газификациядин сад тир оператордин порталрилай ва я газ чара ийидай (газораспределительный) тешкилатрилай вугуз жеда. Гьа са вахтунда къейдзавайвал, арза вугудай маса жуьреярни ава: газ чара ийидай къурулушдин офисдиз жув фена, почтадай ва я МФЦ-дай арза ракъуриз жеда.
Гьа са вахтунда чешмеди хуьруьн мулкара догазификация тухуникайни раижзава. Къейдзавайвал, и карди хуьруьн агьалийрин яшайишдин ери хейлин хъсанарда, ада къулайвални регьятвал твада. Идалайни гъейри, чпиз яшайишдин рекьяй тайин кьезилвилер талукь тир агьалийриз, яшайишдин догазификациядал алава яз, кIвал газдалди таъминардайла, са жерге кIвалахриз акъатай харжиярни эвез хъийизва.
РикIел хкин, виликдай «Дагъустан патал газ» телеграм-каналди республикадин агьалийривай чпин участокрал турбаяр тухунин ва газдин тадаракар маса къачунин макьсадриз акъатзавай харжияр патал государстводивай 100 000 (виш агъзур) манат къачуз жедайдакай раижнай.
Чешмеди къейдзавайвал, агьалидив ада тадаракар маса къачуниз ва вичин участокдал газ тухун патал авунвай кIвалахриз акъатнавай пул вахкуда. И кар патал яшайишдин рекьяй хуьдай идарадив (соцзащита) и документар агакьарун герек къведа: паспорт, хизандин составдиз талукь справка, кIвалахар тухун патал тешкилатдихъ галаз кутIуннавай икьрар, тадаракар маса къачунвайди къалурзавай чек, кIвалахрай пул ганвайвилин квитанцияр, агьали и серенжемдикай менфят къачуз жедай категориядик акатзавайди тестикьарзавай документар…
КIвал газдалди таъминариз ва тадаракар къачуз кIвалин иесиди пулдин такьатар харж тавунани ийиз жеда. И кар патал герек я: газдин компаниядихъ галаз газдин турба кIвализ гъунин патахъай икьрар кутIунун; и икьрар ва и серенжемдикай менфят къачуз жедай категориядик акатзавайди тестикьарзавай документар яшайишдин рекьяй хуьдай идарадиз (соцзащита) вугун. Яшайишдин рекьяй хуьдай идаради газдин компанияди и макьсадриз ийизвай харжийрин гьакъи, арада масад авачиз гуда. И жуьредин куьмек ветеранриз, гзаф аялар ва я тIимил эменни авай хизанриз ва маса категорийрин агьалийриз гузва. И кардин жигьетдай генани тамам баянар «Дагъустан патал газ» телеграм-каналдай кIелиз, гьакI интернетдин маса чешмейрайни чириз жеда.
Гьазурайди — Муса Агьмедов
