Дагъустандин Гьукуматди 2024-2025- кIелунин йисуз жуьреба-жуьре олимпиадайра гъалиб хьайи ва кIвенкIвечи чкаяр кьур 700-лай виниз школьникриз пулдин пишкешар гана.
«Лезги газетдиз» РД-дин Гьукуматдин пресс-къуллугъди хабар гайивал, пулдин пишкешриз лайихлу хьайи школьникрин арада 9-11-классра кIелзавай бажарагълу аялар ава. Абурукай 718 аялдиз (I дережадин олимпиадайрин гъалибчиярни кIвенкIвечи чкаяр кьурбур) — 10 агъзур, «Шаг в будущее» форумда гъалиб хьайи 13 аялдиз 5 агъзур манатдин кьадарда аваз пулдин пишкешар гана. Идалай гъейри, аялар олимпиадайриз гьазурунин карда тафаватлу хьайи 3 муаллимдин зегьмет 100 агъзур манатдин кьадарда авай пулдин пишкешар гуналди къейдна.
Республикадин Гьукуматдин патай пулдин пишкешриз лайихлу хьанвай аялрин арада Ахцегь, Докъузпара, Мегьарамдхуьруьн, СтIал Сулейманан, Дербент районрин мектебра кIелзавай аяларни ава.
Чи мухбир
