Агьалийрин фикирдиз!
«Лезги газетдин» виликан нумрада «Газпром межрегионгаз Махачкала» компаниядин «ифей линиядин» операторри алай йисан сад лагьай паюна республикадин агьалийриз 12 агъзурдалай гзаф меслятар ганвайди къейднавай. Контакт-центради гьар юкъуз дагъустанвийрилай 50-60 арза кьабулнава.
«Дагъустан патал газ» телеграм-каналди гила раижзавайвал, агьалийри хабар кьазвай суалрикай 15 процент газ ишлемишунай гузвай гьакъидихъ (начисление) галаз алакъалубур я.
Чешмеди къейдзавайвал, абонентри виридалайни гзаф ихьтин кардин патахъай гъавурда тун тIалабзава: счетчик авайла ва газ гьар сеферда гьа са кьадар ишлемишзавайла, гьакъидин кьадар артух вучиз жезва?
Компаниядин пешекарри ихьтин гьал арадал атунин кьилин себебар раижзава:
— Иесиди (собственник) счетчикди газ ишлемишунин кьадар къалурзавай рекъемар вахтунда рекье твазвач. Эгер газ ишлемишзавай касди гьар вацра 20-йикъалай 25-йикъалди ресурсдалди таъминарзавай идарадиз счетчикди «алай вахтунда» къалурзавай рекъемар рекье твазвачтIа, и «кисунин муддатда» (яни рекъемрикай хабар тагузвай вахтунда) газ ишлемишунай ракъурзавай гьакъидин кьадар сифтегьан пуд вацра «вацран юкьван гьисабдин ишлемишунал асаслу яз» рекье твада, кьуд лагьай вацралай башламишна, гьакъидин кьадар нормативдал асаслу яз къалурда.
— Квартирада счетчик эцигнава, иеси лагьайтIа, пата-къерехдиз фенва (яни кIвале яшамиш жезвач). Гьатта кIвал ичIи яз хьайитIани (яни ана инсанар яшамиш жезвачтIани), счетчикдин рекъемар гьар вацра ресурсдалди таъминарзавай тешкилатдив агакьарун герек я. Эгер икI тавуртIа, нормативдалди гьакъи гудай схема кардик акатда. Амма эгер яргъал вахтунда пата-къерехдиз фидай игьтияж арадал атайтIа, мисал яз, зур йисуз ва я йисан вахтунда, ада чарасуз и кардикай ресурсдалди таъминарзавай тешкилатдиз хабар гана кIанда.
Ихьтин дуьшуьшра ракъурнавай гьакъидин (начисление) гьахъ-гьисаб (перерасчёт) хъувун патал газ агакьарзавай компаниядиз лагьана кIанда.
— Счетчик ишлемишун патал виже къведайди туш. Гьар са счетчикдин паспортда чарасуздаказ ам акъуднавай ва ам кардик жедай кьван вахтар къалурнава. И вахт акьалтI хьайила, прибор ахтармишун лазим я. И серенжем газ чара ийидай (газораспределительные) тешкилатри кьиле тухузва: прибор гележегда ишлемишун патал виже къведай гьалда авани, авачни тайинарун патал.
Эгер паспортда къалурнавай муддатда счетчик ахтармиш тавуртIа, газ ишлемишунин гьакъидин кьадар нормативдин жуьреда къалурда. Ихьтин вахтунда къалурнавай гьакъидин кьадардин гьакъиндай гьахъ-гьисаб (перерасчет) хъийиз жедач.
Чешмеди къейдзавайвал, тамам делилар чирун ва я меслятар къачун патал «ифей линиядин» нумрадиз зенг ийиз жеда: 8 (800) 200 98 04
Гьаларикай раижна
РД-дин премьер-министр Абдулмуслим Абдулмуслимован гафаралди, алай вахтунда республикадин энергосистемада пар акьалтунин цIийи виниз тир рекъемар къейднава: 15-июлдилай 24-июлдалди электроэнергия ишлемишунин вини кьадар 6 сеферда виниз акъатнава.
Дагъустандин Гьукуматдин сайтда къейднавайвал, 23-июлдиз и жигьетдай рекъем 1 360 МВт.-див агакьна, им 2024-йисав (1 274 МВт) гекъигайла, 86 МВт-дин ва я 6,8 процентдин, 2023-йисан вини кьадардив гекъигайла, 14,5 процентдин гзаф я. Виниз тир пар акьалтуни энергетикадин объектар технологиядин жигьетдай къайдадикай хкатунрал гъанва.
Чешмедин малуматралди, электроэнергия хкатуни агьалияр патал къулайсузвилер арадал гъизва, насосрин станцияр акъваззава, са жерге дуьшуьшра целди таъминарунин кIвалахда акъвазунар жезва. Къайдадикай хкатай (аварийный) гьалар арадал атунин ва электроэнергия хкатунин кьилин себебар ибур яз ама: электроэнергия агакьардай линияр гьалдай фин, энергия ишлемишунин кьадар садлагьана артух хьун, сетдин къурулуш ремонт авунин ва цIийи къайдада туьхкIуьрунин кардиз бес кьадарда инвестицияр ахъай тавун…
«Дагэнерго»-дин докладда къейднавайвал, алай вахтунда ресурсдалди таъминардай вири идараяр технологиядин жигьетдай къайдадикай хкатунрин нетижаяр арадай акъудунал желбнава. «Россети Северный Кавказ» — «Дагэнерго» ПАО-дин филиалдин 173 бригада (678 пешекарни махсус техникадин 294 уьлчме), герек хьайила, гьасятда кIвалахдив эгечIиз гьазур я.
Гьазурайди – Муса Агьмедов
