И мукьвара чи ватанэгьли Луиза Аликовна Велибеговади Москвада, Федеральный илимдин аграрный экономикадин ва хуьруьн мулкар яшайишдин рекьяй вилик тухудай центрадин базада — Вирироссиядин хуьруьн майишатдин экономикадин илимдинни ахтармишунрин институтда (ФГБНУ ФНЦ ВНИИЭСХ) — экономикадин илимрин докторвилин тIвар агалкьунралди хвена. Илимдин кIвалахдин (тема: «Развитие плодового подкомплекса в системе продовольственной безопасности») макьсад емишар гьасилунин хел (подкомплекс) вилик тухунин рекье теориядинни методикадин дибар ва тежрибадин меслятар арадал гъуникай ибарат тир.
Л. Велибеговадин кIвалахдин илимдин меслятчи (консультант) экономикадин илимрин доктор, РАН-дин член-корреспондент, ФГБНУ ФНЦ ВНИИЭСХ-дин аграрный политикадин ва АПК вилик тухунин гьаларикай виликамаз лугьунин отделдин заведующий Андрей Колесников тир.
Луиза Аликовнадин ери-бине Докъузпара райондин Миграгъай я. Ада Махачкъаладин 37-нумрадин гимназияда кIелна. 1999-йисуз Дагъустандин хуьруьн майишатдин академия агалкьунралди акьалтIарна, «Бухгалтерский учет ва аудит» пешекарвал къачуна. Са йисалай ам аспирантурадиз гьахьна, 2006-йисуз Махачкъалада кандидатвилин диссертация хвена. 2010-йисуз адаз Москвадин автомобилринни рекьерин институтдин экономикадин теорийрин кафедрада доцентвилин тIвар гана. Алай вахтунда чи ватанэгьлиди РАН-дин Дагъустандин федеральный ахтармишунрин центрадин яшайишдинни экономикадин ахтармишунрин Институтда илимдин кар алай къуллугъчи яз зегьмет чIугвазва.
Ахтармишунрин нетижа яз, 2024-йисуз ада «Алеф» издательствода монография («Развитие плодового подкомплекса: теория, методология, практика») чапдай акъудна. Ам гьакIни илимдин кIвалахрин, гьа жигьетдай яз Россиядин реферируемый журналра, яни рекье твазвай кIвалахар чапдалди аслу тушир экспертри ахтармишзавай илимдин изданийра, чапнавай цIудралди макъалайрин автор я. Луиза Велибеговади Вирироссиядин ва международный илимдинни тежрибадин конференцийра, РАН-дин уртах дисциплинайрин ахтармишунрин программайра иштиракзава.
«Лезги газетдин» редакциядин коллективди Луиза Аликовнадиз докторвилин диссертация хуьн тебрикзава ва адахъ илимдин рекье мадни еке агалкьунар, гьакI мягькем сагъламвал хьун алхишзава.
Регина Семедова
