ЦIийиз туькIуьрзавай рекьерин еридал гьалтайла, Дагъустан Россиядин виридалайни хъсан 10 региондин жергеда гьатнава.
Рейтинг «Новости» РИА-дин экспертри «Росстат»-дин ва «Росавтодор»-дин материалрин бинедаллаз гьазурнава. Дагъустан рекьерин ери тайинарун патал уьлкведин ахтармишунар кьиле тухвай 85 региондин арада 9-чкадал акъатна. Экспертрин гафаралди, Кеферпатан Кавказдин регионда авай рекьерин 74,3 процентди абурун еридиз талукь яз тайинарнавай истемишунриз жаваб гузва.
Алай йисуз милли «Инфраструктура для жизни» проектдин куьмекдалди республикадин 15 районда рекьерихъ галаз алакъалу кIвалахар кьиле тухузва. Йисан эхирдалди умуми яргъивал 142,5 километрдиз барабар тир жуьреба-жуьре рекьерин участокар цIийикIа туькIуьр хъийидайвал я. РикIел хкин, и проектди виликдай кардик кваз хьайи «Безопасные качественные дороги» проект эвезнава.
Рекьерин къурулуш вилик тухуниз республикадин Кьил Сергей Меликова кьетIен фикир гузва. Виликдай ада хабар гайивал, 2025-йисуз Дагъустанда рекьерин 484 километрдин мензил ва 13 муьгъ цIийикIа туькIуьр хъувун фикирдиз къачунва.
