ЦIийи ктабар
Бажарагълу шаир, публицист Мердали Жалилова кIелзавайбур мад са цIийи ктабдалди шадарна. Мукьвара “Мавел” басмаханада акъатнавай гъвечIи кIалубдин кьелечI ктаб “Рекьерин эвер” поэмадикай ибарат я.
Шаирди и эсер 20-асирдин 70-80-йисара кхьенва, ам БАМ (Байкало-Амурская магистраль) зурба рехъ туькIуьрай девирдихъ галаз алакъалу я. Вири пипIерай хьиз, эцигунрин кIвалахра Дагъустандин жегьилрини зегьмет чIугуна.
Ктаб 110 чиникай ибарат я, авторди эпилог мукьвара алава хъувунва. Вичиз хас тир устадвилин хатIуналди теснифнавай, фасагьатдиз кIелиз жедай эсердин кьилин игитар тир Мириманни Сейранан къаматралди авторди зегьметкешвал, къастунал кIевивал, пак кIанивал, халисан дуствал, экуь гележегдихъ умудлувал къалурзава.
Инал заз куьрелди эсердин шикил къалуриз кIанзава. Са юкъуз жегьил Миримаз кьве чар санал хквезва: Ватандин вилик буржи тамамарунин патахъай повестка ва имтигьанар вахканвайдан гьакъиндай тел. КIелунин месэла кьулухъ туна, Мирима сифте нубатда Ватандиз къуллугъ авун герек яз гьисабна. Ам мекьи ва яргъал тир Сибирдиз акъатзава. Сейранакай шегьерда духтурвал кIелзавай студентка жезва. Мирима гъурбатда аскервалзавай вахтунда, гъвечIи чIавалай адан дуст тир Къадима вичин багърияр Сейранан патахъай илчивализ адан кIвализ ракъурзава. “ГьикI экъечIда дуст дустунин къаршидиз? Илчи вуж я, къе атана кIвалевай?” лугьуз, Сейрана русвагьвилин суалар гузва. Эхирдай руша Къадиман багърийрин “гафарик кIвачиз гьахьдай михер ква” лагьана, кьетIивилелди вичин наразивал малумарна.
БАМ туькIуьриз куьмек гун патал Дагъустандин жегьилризни эвер ганвайла, институтда кIелзавай Сейранани аниз фин кьетIна. Яргъал тир Сибирда ам ва Мирим “кьисметди” сад садал дуьшуьшар хъийизва.
К.Ферзалиев
