Алай йисан 3-майдиз, 85 йисан яшда аваз, чи арадай вичин савадлу вири уьмуьр илимдиз бахш авур физикадинни математикадин илимрин кандидат, педагогвилин зегьметдин ветеран, адалатлу хизандин кьил, яр-дустунал рикI алай хъсан инсан Муса Рамазанович Исаев акъатна.
М. Р. Исаев 1935-йисуз Сийидрин хуьре хана. Аял чIавалай кIелунрал рикI алаз чIехи хьайи ада Кьасумхуьруьн юкьван школа лап хъсан къиметар аваз акьалтIарна. 1951-йисуз ам Даггоспедуниверситетдин физикадинни математикадин факультетдик экечIна. Анаг яру дипломдалди акьалтIарай жегьил муаллим-физик Рутул райондин Ихрекрин хуьруьз кIвалахиз рекье туна. Ина ада жергедин муаллим, завуч, школадин директор яз кIвалахна. Школада хъсан тежриба хьанвай ам кIелун давамарун патал аспирантурадик экечIна.
Муса Рамазановича СССР-дин АН-дин Дагъустандин филиалда, физикадин институтда, кIеви материалрин физикадай физикадинни математикадин илимрин кандидатвилин диссертация агалкьунралди хвена. И девирда, махсус лаборатория арадал гъунихъ галаз сад хьиз, ада чIехи шегьерра илимдин гзаф мярекатра-симпозиумра, конференцийра иштиракна.
1974-йисуз Даггоспединститутдиз кIвалахал атун теклифна. Ина ада вичин вири къуватар ва тежриба студентриз физикадай чирвилер гунин кардиз бахшна. Ада вишелай виниз илимдин кIвалахар, пособияр, куьмекчи материалар кхьена.
1995-йисуз вуздин ректордин теклифдалди, ДГПУ-да физикадай заочный къайдада кьилин образование къачудай отделение (ОЗО) кардик кутуна ва адан кьилени Муса Исаев акъвазна. 2016-йисалай педагогвилин зегьметдин ветеран, РД-дин лайихлу муаллим, машгьур алим вичин асул кеспидивай — ДГПУ-дин кафедрадин доцентдин къуллугъдивай къерех хьана.
Алимдин гзаф йисарин намуслу зегьметдиз гьукуматди лайихлу къиметни гана. Ам В.Ленинан 100 йисан юбилейдин медалдин, СССР-дин АН-дин Президиумдин Гьуьрметдин грамотадин, “Дагъустан Республикадин лайихлу муаллим” гьуьрметдин тIварцIин ва са жерге маса шабагьрин сагьиб тир. Адаз вичи кIвалах авур вири коллективра еке гьуьрмет ва авторитет авай.
Муса Рамазанович Исаев чи арадай акъатунихъ галаз алакъалу яз чна адан хизандиз, вири мукьва-кьилийриз, дериндай хажалат чIугунивди, башсагълугъвал гузва. Адан экуь къамат чи рикIера гьамишалугъ яз амукьда.
Дустарин са десте ва вири мукьва-кьилияр
