21-ноябрдиз рекьерихъни улакьрихъ галаз алакъалу чIуру агьвалатра телеф хьайибур рикIел хкидай Виридуьньядин югъ къейдна. Рекьерин гьерекатрин хатасузвилер артухарунин жигьетдай РФ-дин къенепатан крарин министерстводи кар алай серенжемар кьабулун давам жезватIани, къурбандрин, рекьера “агъавалзавайбурун” кьадар йисалай-суз пара жезва.
И йикъара уьлкведин, республикадин электронный такьатра, соцсетра Москвадин Кутузован куьчеда арадал атай улакьрин авариядикай рахунарни веревирдер давам жезва. Ана машгьур автоблогер, дагъустанви Саид Губденский ва адахъ галаз машинда ацукьнавай кьвед лагьай касни кьена. Мад кьве касдиз тIарвал хьана. Саида гьалзавай BMW машин Mercedes ва VoIvo машинра акьуна. Соцсетра бязибуру кхьизвайвал, хатасузвилин чIул кьванни гьалднавайтIа, уьмуьр къутармиш хьун мумкин тир.
Рекьерин гьерекатрин къайдаяр кьасухдай чIурзавайбур, идалди чеб “тафаватлубур”, “викIегьбур”, улакь гьалунин жигьетдай масадахъ авачир хьтин алакьунар авайбур яз гьисабзавай кьил бушбур чаз чидай аямда гьамиша хьана ва абурун кьадар, аквазвай гьаларай, къвердавай мадни артух жезвай хьтинди я. ГьикI хьи, улакь гьалдайла, жуьреба-жуьре уюнар акъудзавай ксари чlуру гьерекатар чеб патал лезетлу крар яз гьисабзава. Кар ана ава хьи, гьа “тафаватлубур” себеб яз, са тахсирни квачир, рекьерин гьерекатрин къайдаяр чIур тийизвай инсанар къурбандриз элкъвезва.
Алай вахтунда алава хъхьанвай мад са себеб мо-бильный телефонрихъ галаз алакъалу я. Улакь гьалзавай касди, са гъилив телефонда тIуб экъуьриз, рекьелай вилер алудзавай дуьшуьшар себеб язни, гзаф кьадар хасаратвилер арадал къвезва. Гьатта автобусар, маршруткаяр гьалзавайбурни, игьтиятлувал квадарна, улакьда ацукьнавай инсанри туьгьметар авунихъайни кичIе тахьана, “хихи-хаха” ийиз, телефондив къугъваз жеда.
Хъвана, рулдихъ ацукьзавайбуру, адет яз, чеб полициядин къуллугъчийри кьадатIа-кьадачтIа лугьуз, гьа кардикай фикирда. Амма чебни, чеб себеб яз масабурни хаталувилик акатуникай гьич фикирдач. Полициядин къуллугъчийрин макьсадни тахсиркарвилерин вилик пад кьун я эхир.
Статистикадин делилар гьисаба кьуртIа, алай йисан сифте кьилелай инихъ 10 вацран муддатда Россиядин рекьерал улакьрихъ галаз алакъалу бедбахтвилин дуьшуьшрикди 12 агъзур кас кьван кьена. Рекьерал 109 агъзур чIуру агьвалат арадал атана.
К.Ферзалиев
