Чи ватанэгьлияр — гьар сана
Ростов шегьерда яшамиш жезвай гзаф лезгийриз Ариф Меликован тIвар хъсандиз чида. Урусатда милли мярекатар тешкилуник, ватанэгьлияр сад-садав агудуник вичин пай кутазвай Ариф Ростовда яшамиш жез ва ана карчивилел машгъул яз къад йис кьван я. Мукьвара ам Ростовда яшамиш жезвай агъсакъал Афис Абдурагьмановахъ галаз санал “Лезги газетдин” редакциядиз атайла, адахъ галаз чун мукьувай таниш хьана. Ростовда яшамиш жезвай ватанэгьлийриз чна редакциядин къуллугъчийри хайи чIалал акъуднавай ктабар, газетдин цIийи нумраярни пишкешна. Заз малум хьайивал, хайи чил рикIе аваз, жуван чIал, милли ивирар хуьн патал абуру чпелай алакьдай вири жуьредин гьерекатар, серенжемар кьилиз акъудзава.
Ариф Нарудинович Меликов 1979-йисан 15-сентябрдиз СтIал Сулейманан райондин Герейханован хуьре дидедиз хьана. Адан аял вахтар Къазахстандин Новый Узень шегьерда акъатна, 1989-йисуз СтIал Сулейманан райондин Герейханован хуьруьз хтана. Ина хуьруьн мектеб, ахпа автомобилринни рекьерин колледж куьтягьна. Яракьлу кьушунрин жергейра къуллугъна хтайдалай инихъ ам вичин хизанни галаз Дондал алай Ростов шегьерда яшамиш жезва. Мукьвал-мукьвал хайи хуьруьз хквезва, Дагъустандин хуьрера, шегьерра цIийи танишрихъ галаз гуьруьшар тешкилзава. А.Меликова 2018-йисуз Махачкъаладин ДГПУ-да кьиле фейи лезги чIалан гегьенш форумдани иштиракна.
Ростовда яшамиш жезвай вишелай гзаф лезгийрикай ибарат интернет-кIватIал арадал гъанва, мукьвал-мукьвал гуьруьшар, мярекатар кьиле тухузва, ватандивай яргъа аватIани, милливал хуьз алахъзава.
“Гьар гьяддин юкъуз чна, Ростов шегьерда яшамиш жезвай лезгийри, футбол къугъун тешкилзава. Алатай йисуз чна ина сифте яз Яран сувар гурлудаказ кьиле тухвана, Дагъустандай “Штул” ансамблдизни теклифна. ЦIи сифтедай Краснодарда, ахпа чна Ростовдани лезги халкьдин “Шарвили” эпосдин сувар кьиле тухвана, спортдин милли жуьрейрай акъажунар тешкилна, милли хуьрекар дадмишна, иштиракчийриз цIилинин пагьливанрин алакьунриз килигдай мумкинвал хьана”, — лугьузва А. Меликова.
Мярекатрик кьил кутунин, абур тешкиллудаказ кьилизни акъудунин карда Ариф Меликова активистрихъ галаз санал виликамаз гьазурвилер аквазва.
“Чна Краснодардин, Ставрополдин крайра авай лезгийрихъ галазни сих алакъаяр хуьзва. Мярекатар тухудайла, мугьманвилериз физва”, — алава хъувуна А.Меликова.
Мукьвара чи ватанэгьлийри Краснодардиз ва Ростовдиз лезги театрдиз теклифдайвал я. Милли меденият, тарих, хайи чIал хуьнин ва абур жегьилрин арада машгьурунин карда зегьмет чIугвазвай, и рекьяй таблигъат тухузвай гьар са ватанэгьлидиз баркалла.
К.Ферзалиев
