Зи рикIел аламайвал, дяведин йисара чи хуьре чIехи-гъвечIида чпелай алакьдайвал кIвалахар тамамарна.Зи ихтилат дяведин женгера активнидаказ иштиракай Челябов Мегьамедакай я.
Армиядиз ам дяве башламишай сифте йикъара фенай. А вахтунда ам колхозда зегьмет чIугвазвай лежбер итим тир. Адахъ галаз уьмуьрдин юлдаш Седефани кIвалахзавай. Сада векь ягъиз хьайитIа, муькуьда юлдашрихъ галаз кьурайбур кIунтIара твадай. Сада гвенар гуьдай, муькуьда хармандал цуьлер хутахдай. Салара, багъларани гьар жуьре кеспияр кьилиз акъуддай.
Фронтдиз фейи Мегьамед Челябова аскервилин вердишвилер Ростовдин областда къачуна. Ахпа ам Ленинграддин областдиз тухвана. Ина ада Волховдин патарив шегьер хуьнин, блокададин серенжемра, Финский заливдин кар алай чкаяр душмандикай хуьнин, шегьердиз продукт агакьарзавай улакьриз дуьз рехъ къалурунин ва душмандиз чир тежервал чкадал агакьарунин серенжемра иштиракна. Гьелбетда, ибур лугьуз регьят, амма тамамариз гзаф жавабдар, четин кIвалахар тир. М.Челябова абуруз дурум гана.
Душманди мягькемдиз кьур гьалкъа Яру Армияди кьатIна. Гила Берлиндин терефдихъ фидай вахтни алукьна. М.Челябов авай полкни гьаниз рекье туна. И вахтунда ам автоматчикни тир, разведчикни. Берлиндин куьчейра лап къати ягъунар хьана. Иллаки — Рейхстагдин патарив. Чи аскерар гьурра кьилел алаз дараматдин къенез гьахьна. Бязи аскерри цларал чпин гъилералди са гьихьтин ятIани лишанар ийизвай. М.Челябовани цлаз сифтедай вичин пац яна, ахпа тIвар кхьиз алахъна…
Гъалибвал Мегьамед Челябова Берлинда къаршиламишна. Хуьруьз ам хурудал медалар алаз хтана. Ада чаз, аялриз, наградаяр, вичин плащ-палатка ва маса затIар къалурнай. Адакай чи колхозда багъманчивилинни саларбанвилин бригададин бригадир хьана. Ахпа ам хуьруьн советдин председателвиле хкяна. Адан хизанда са рушни 3 гада чIехи хьана.
Челябов Мегьамедан стха Абдулагьани дяведа викIегьвилер къалурнай.
Райсудин Набиев
