Къизгъин гьалар

Алатай гьафтеда Эрменистанди Азербайжандихъ галаз авай сергьятдал хьайи къалмакъалрин нетижада бязибур кьейидакай ва гзафбурал хирер хьайидакай малумарна. Адалай кьулухъ гьалар лап къизгъинбуруз, телефвилерни магьрумвилер галайбуруз элкъвена.

Эрменистандин оборонадин министерстводин делилрал асаслу яз, “Новости” РИА-ди хабар гузвайвал, Къарабахда ягъунар кьиле фейи вахтунда хейлин аскерриз хасаратвилер хьанва, бязибур кьенва.

Идалай вилик Азербайжандин терефди гуьлле гуникди Эрме­­­нистандин ислягь агьалийриз хасаратвилер хьайидакай раижнай.

Къалмакъалдин гьалар цIийи кьилелай 27-сентябрдиз ­къизгъин хъхьана. Сифтедай Азербайжанди Эрменистандин ­кьушунри ягъунар кьуникди ислягь уьмуьр кьиле тухузвай ва­тандашар къурбандриз элкъвейдакай малумарнай. Нетижада Азербайжандин терефди сергьятдал женгинин гьерекатар башламишна.

Идалай вилик Россияди кьве терефдизни женгер акъвазаруниз, меслятдал атуниз эвер ганай. Кремлдин пресс-къуллугъди хабар гайивал, Къарабахдин гьалар веревирд авун патал Эрменистандин премьер-министр Н.Пашиняна РФ-дин Президент В.Путиназ зенгна. Россиядин регьберди алай вахтунда кьве терефдини ягъунар акъвазарун важиблу тирди къейдна.

Россиядин бязи политологри, военный пешекарри къейдза­вай­вал, ягъунрин нетижада хьайи телефвилерикай, хасаратвилерикай кьве терефдини якъин тушир делилар, рекъемар чукIур­зава. Сада муькуь республикада телеф ва зарар хьайибурун ре­къемар раижзава. Гьар уьлкведи вичин шумуд аскердиз, ватандашдиз хасаратвилер хьанватIа, гьадакай тамам малуматар раиж­завач.

Эрменистандин векил В.Биягова республикадин мулкарин битаввал къурхулувилик акатун мумкин яз гьисабзава.

Жуьреба-жуьре электронный чешмейра кьейибурун, хирер хьайибурун гьакъиндай чкIизвай делилрин кьадар югъ-къандавай артух жезва. Информациядин майданрани гегьенш женгер тухузвай макъамда гьар са делилдин якъинвилел ихтибариз жедач. Инкар ийиз тежер делил сад я: регьберрин терсвилерни меслятсузвилер себеб яз, са тахсирни квачир ксар, жегьил аскерар уьмуьр­дивай жезва. Къурбандрин жергеда Азербайжандин лезгиярни, гьакI маса миллетрин векиларни ава. Къалмакъал акъуднавай терефриз бязи маса уьлквейрини ислягьвилиз, меслятвилиз эвер гузва.

“Лента.ру” чешмеди раижзавайвал, са бязи делилралди, Туьр­кияди женгерин гьерекатар кьиле физвай зонадиз гьакъидихъ кьунвай Сириядин аскерар ракъурнава. Амма Туьркиядин терефди Къарабахдиз гьакъидихъ кьунвай Сириядин аскерар ракъурнава лугьудай хабар тапанди тирди къейдна. Идакай Туьркиядин адалатлувилинни еримлувилин партиядин пресс-секретарь О.Челика малумарна. Ада ихьтин информация чIулав таблигъатдив гекъигна.

Идалай вилик Туьркиядин МИД-дин кьил М.Чавушогълуди Анкара Бакудиз куьмек гуз, адан итижар патал женгер чIугваз, гьа идалди “кьве уьлкведа са миллет хуьз” гьазур тирди малумарнай­.

Къейд ийин, агьалийрин чIехи пай эрменийрикай ибарат Къарабахди 1991-йисуз Азербайжандилай аслу туширвал малумарна. Бакудиз къуватдин куьмекдалди регион вахчуз кIан хьунин нетижада дяведик цIай акатна. 1994-йисуз Азербайжанди­, Эрменистанди ва тестикь тахьанвай дагълух Къарабах республикади, Россиядин арачивилин иштираквал аваз, баришугъ хъхьунин гьакъиндай протоколдал къулар чIугунай. ЯтIани, къалмакъалдин гьерекатар акъваззавач.

Акси я

Франциядин президент Э. Макрона Белоруссиядиз акси яз тади гьалда санкцияр кардик кутун герек яз гьисабзава. Идакай “Новости” РИА-ди хабар гана.

Адалайни гъейри, Макрона къейднавайвал, уьлкведин гьалар­ пайгардик кухтун патал арачивал арадал хкун лазим я. Адан фи­кирдалди, и месэлада арачивилин кIвалах ОБСЕ-ди (Организация­ по безопасности и сотрудничеству в Европе) тухвана кIан­зава. Францияди лагьайтIа, и кар патал мумкин тир вири алахъунар ийида.

ГъвечIи гадади къутармишна

Англиядин Блэкберн шегьерда цIуд йисан яшда авай гадади туьтуьна кубик акIай гъвечIи вахан уьмуьр къутармишна. Гададин­ рикIел гьасятда мектебда вичиз чирай медицинадин рекьяй сифте­ куьмек гунин къайда хтана. Идакай “Daily Mail” чешмеди раижна.

КIвале къугъвазвай гададиз садлагьана утагъдин ракIарихъ атанвай вичин ругуд йисан яшда авай вах акуна. ГъвечIи ру­шавай нефес къачуз жезвачир, адан вилерал накъвар алай, чин яру хьанвай. Адан гьал кьатIай гадади гьасятда диде-бубадиз эверна. Амма вич гуьзетиз акъвазнач. Бамиш хьанвай инсан къу­тармишунин Геймлихан къайда гададиз мектебда къалурнавай. Садан куьмекни галачиз, адалай гъвечIи руш къутармишиз алакьна.­

Бамиш хьанвайбур къутармишунин рекьяй Геймлихан къайда ихьтинди я: туьтуьна затI акIанвай касдин руфун кьулухъай кьуна, са гъуд руфунал, кьвед лагьай гъилин кап а гъутал эцигна, илисиз, винидихъди фад-фад румар гузва.

«Лезги газет»