Малум тирвал, са шумуд юкъуз къвайи къати марфар себеб яз алай йисан 5-октябрдин йифиз автомо-билрин “Кьасумхуьр-Цмур” шегьре уьцIенай. Нетижада рекьин 3 километрдин участокда 200 метрдин мензил къайдадикай хкатна, 5 хуьруьхъ галаз улакьрин алакъа амукьнач.
Алай вахтунда Цмурдал ва гьа патан маса хуьрериз фидай цIийи рехъ тухузва. И йикъара райондин кьил Нариман Абдулмуталибов, талукь къуллугърин руководителарни галаз, нубатдин сеферда чкадал фена, кьиле тухузвай кIвалахрихъ галаз таниш хьана.
Малум хьайивал, рехъ цIийи участокдай тухузва. И кардал райондин ДЭП-32 ва Дербентдин ДРСУ машгъул я. ДЭП-32 карханадин начальник И.Шихбабаева Нариман Абдулмуталибоваз лагьайвал, 850 метрдин яргъивал аваз цIийи рекьин бине кутунин ва аниз хирхем вегьинин кIвалахар 1-декабрдалди акьалтIарда, анай машиндин гьерекат башламишда. Санлай 2,5 километр яргъивал алай рехъ къведай йисуз бинедилай ремонтда.
Нариман Абдулмуталибова рехъ ремонт хъувунин ва цIийи рехъ тухунин патахъай тади гьалда къайгъударвал авунай Дагъустан Республикадин Кьил Сергей Меликоваз, ремонтдин кIвалахар тухунай РД-дин транспортдин минис-терстводиз, Дагавтодордиз, ДЭП-32 ва Дербентдин ДРСУ-дин карханайрин коллективриз чухсагъул лагьана.
«Лезги газет»
