Дагъустанда эхиримжи вахтара хуьруьн майишатдин производстводин гьар жуьре хилера цIийи объектар арадал гъун бинеда авай жуьреба-жуьре инвестпроектар уьмуьрдиз кечирмишзава.
ИкI, Мегьарамдхуьруьн районда АПК-дин чIехи кьве проект кардик кутунва, хабар гузва РД-дин хуьруьн майишатдин ва недай суьрсетдин министерстводи.
“Премиум” ООО-ди малар тукIвадай чка эцигунин проект кьилиз акъуднава — ина сменадин вахтунда ири карч алай 50 ва куьлуь карч алай 650 гьайван тукIвадай мумкинвал ава. Инвесторди хсуси такьатрикай яз 60 миллион манатдилай гзаф пул харжнава, абурукай 14 миллиондилай гзаф такьатар малар тукIвадай линия ва холодильникар маса къачуниз серфнава.
Карханадиз як гьам къенепатан, гьамни мукьвал ва яргъал тир къецепатан уьлквейрин базаррив агакьардай ният ава. Кьилди къачуртIа, як Кувейт Республикадиз ре-кье тунин гьакъиндай икьрарар кутIуннава, и жигьетдай Арабрин Египет Республикадихъ галаз рахунар гьеле давам жезва.
“Идалайни гъейри, Мегьарамдхуьруьн районда “Мегьарамдхуьр” СпоК-ди санлай 1450 тонн емишар ва майваяр хуьз жедай гьамбархана эцигунин инвестпроект кьилиз акъуднава. Проектдин къимет 60 миллион манатдиз барабар я. СпоК-диз государстводин патай куьмек яз 31,2 миллион манатдин кьадарда аваз грант ганва.
Алай вахтунда холодильникрин камерайра хуьруьн майишатдин жуьреба-жуьре суьрсет эцигзава. Кьилди къачуртIа, ина 130 тонн хурма, тахминан 100 тонн буранар, 20 тонндилай гзаф ичер эцигнава”, — хабар гузва министерстводин пресс-къуллугъди.
«Лезги газет»
