19-ноябрдиз Кьурагьрин ДЮСШ-дин дараматда райондин умуми образованидин идарайра кIелзавай аялрин арада азаддаказ кьуршахар кьунай СССР-дин спортдин мастер Н.М.Камалдинован экуь къаматдиз бахшнавай турнир кьиле тухвана. ДЮСШ-дихъ галаз санал ам тешкилнавайди райондин спортдинни физический культурадин ва жегьилрин крарин рекьяй отдел тир. Идакай райондин администрациядин сайтда хабар ганва.
Вичин ери-бине Гелхенрин хуьряй тир Неби Камалдинов са шумуд сеферда дзюдодай Дагъустандин чемпион, гьакIни мастервилин гзаф кьадар турниррин гъалибчи тир. Спортдивай къерех хьайила, ада тренервиле зегьмет чIугуна. Адан гъиликай спортдин мастерар ва жуьреба-жуьре акъажунрин гъалибчияр гзаф хкатна.
Турнир гила кьвед лагьай сеферда тешкилнава. ЦIи ана 80-дав агакьна жаванри заланвилин 11 категориядай чпин алакьунар къалурна. Турнирдин макьсад жаван спортсменрин устадвал хкажун, райондин хкянавай команда патал викIегь спортсменар тайинарун, спортсменрин арада дуствал мягькемарун ва, кьилиндини, Неби Мегьамедовичан лайихлувилериз къимет гун тир.
Тамам 6 сятда кьиле фейи къизгъин бягьсерин нетижада турнирдин гъалибчийрин ва кьилдин пишкешриз лайихлу хьайибурун тIварар раиж хьана. ИкI, 1-чка КIирийрин хуьруьн жаванри кьуна.
* * *
Мегьарамдхуьруьн райондин сайтда хабар гузвайвал, 21-ноябрдиз, арифдар Мегьамед Ярагъвидин экуь къаматдиз бахшна, райондин ДЮСШ-рин аялрин (2008-2010-йисара дидедиз хьанвай) арада мини-футболдай турнир кьиле тухвана.
Ярагъ-Къазмайрин хуьре М.Ярагъвидин тIварунихъ галай мектебдин футбол къугъвадай чIурал кьиле тухвай и акъажунра райондин 6 командади иштиракна. Турнирдин тешкилатчи райондин администрациядин физический культурадин ва спортдин отдел тир.
Райондин кьил Фарид Агьмедова къейдзавайвал, неинки пешекарвилин, гьакI жегьилрин ва массовый жуьредин спортни датIана вилик тухун лазим я. ИкI, спортдиз талукь яз муниципальный программа кьилиз акъудунин сергьятра аваз “Сагълам беденда — сагълам руьгь”, гьакIни “Жегьилри сагълам уьмуьрдин тереф хуьзва” ва “Чун террордиз акси я” лишанрик кваз кьиле тухвай спортдин серенжемда Мегьарамдхуьруьн ДЮСШ-да вердишвилер къачузвай жаванар 1-чкадиз лайихлу хьана. Бут-Къазмайрин ДЮСШ-дин командайри 2 ва 3-чкаяр кьуна.
Чи мухбир
