Квез чидани?
Дуьньядин аламатдин тоннелрикай сад Китайдин Тайхан дагълара авай Гуолян я. Инсанривай дагъдин синерилай Гуолян шегьердиз физ хьун патал 1970-йисара Китайда дагъда тоннель арадал гъана. Дагъдин кьвалай акъуднавай тоннель инсан тажубардай имаратдиз элкъвенва. Ам туькIуьрдайла, са шумуд фяле кьена, гьавиляй тоннелдал халкьдин арада “гъалатIар эх тийидай рехъ” тIвар акьалтна.
Тоннелдин яргъивал 1200, гьяркьуьвал 4 ва кьакьанвални 5 метр я. Хъсандиз экуь хьун патал, дагъдай кьацIар акъудна, 30 дакIар туькIуьрнава. Тоннелдай анжах кьезил машинда аваз ва я велосипеддал алаз физ жезва. Дагъ падна туькIуьрнавай имарат инсандик кичI кутадай хьтинди я.
Дагъдин имарат китайвийрин дурумлу зегьметдин, мягькемвилин ва къудратлувилин ярж яз гьисабзава. Аламатдин кар ам я хьи, са шумуд касдикай ибарат дестеди, лазим тир алатар къачуна, 5 йисан къене чпин гъилеривди дагъда тоннель туькIуьрна.
Алай вахтунда аламатдин рехъ-тоннель туристар патални фикир желбдай чкадиз элкъвенва. Са патахъай агьалийри и кардал шадвалзавачтIани, муькуь патахъай, абуруз алава менфят къведай мумкинвал хьанва. Тоннелдин сергьятра мугьманханаяр ва кафеяр кардик ква.
Чи мухбир
