Алай девирда инсанриз интернет галачир уьмуьр фикирдиз гъун четин я. А такьат вирибур патал “вири авай, жагъидай” чешмедиз элкъвенва. Кьилдин халкьарихъ, миллетрихъ, гьа жергедай яз лезгийрихъни махсус сайтар ава. Абурун арада “Лезги чIални литература” (https://www.IezgichaI.ru) сайтди иллаки кьетIен чка кьазва, гьикI хьи, ана авай материалар анжах лезгийриз талукьбур ва чебни хайи чIалал кхьенвайбур я. Ана авай малуматрикай, шикилрикай, электронный ктабрикай, эдебиятдин эсеррикай агъзурралди инсанри менфят къачузва. Зи ихтилат гьа и сайт 2007-йисуз арадал гъайи чIехи ватанперес Орхан Расулович Мирзалиевакай я.
Ам 1987-йисуз КцIар райондин Къалажухрин хуьре дидедиз хьана. Алай вахтунда Бакуда яшамиш жезва. Мектеб куьтягьайдалай кьулухъ ада Бакудин архитектурадинни эцигунрин университетда кIелна. Ада информационный технологиядин хилезни гзаф итиж ийизва.
Ватанэгьлиди арадал гъанвай сайтда хайи чIалаз, эдебиятдиз, тарихдиз талукь электронный ктабар ава. Шаиррикайни абурун яратмишунрикай, алимрикайни абурун кIвалахрикай сайтда лап гзаф материалар ава. Идалайни гъейри, Орхана лезги чIалан онлайн-тестер, къугъунар туькIуьрнава. Вичин къурулуш ва чапзавай материалар анжах лезги чIалал хьунин делил фикирда кьуртIа, а сайтдиз тешпигьди лезгийрихъ интернетдин алемда мад авач.
Орхана арадал гъайи мад са зурба проект алатай йисалай кардик акатна: ада лезгийрин 6 гафаргандин (А.Гуьлмегьамедован баянрин, М.Гьажиеван урус чIаланни лезги чIалан, Б.Талибованни М.Гьажиеван лезги чIаланни урус чIалан, Ю.Халилован лезги чIаланни азербайжан чIа-лан, адан азербайжан чIаланни лезги чIалан, Р.Расулован лезги чIаланни ингилис чIалан гафарганар) бинедаллаз сайтда “онлайн-таржумачи” гафарган туькIуьрнава. Гьа ихьтин онлайн-гафаргандикай ибарат яз, мукьвара мобильный телефонра менфят къачуз жедай махсус приложение гьазурнава.
Къенин девирда интернетда милли ресурсар, делилар, миллетдикай малуматар гьикьван гзаф хьайитIа, гьакьван хъсан я. И кар аннамишнавай Орхана чIугвазвай зегьмет тарифуниз лайихлу я.
Чи йикъара, интернетдикай менфят къачуналди, чеб раижиз, машгьуриз алахънавай ксарни авачиз туш. Орхан Мирзалиевакай рахайтIа, ам акван тийизвай “фронтда” текдиз гьерекатдик квай женгчи я. Зун адахъ галаз цIуд йис идалай вилик таниш хьана. Вичиз са менфятни авачтIани, халкьдин милли ирсинин къайгъударвалзавай ватанэгьлиди, кагьулвал тийижиз, вилик эцигай макьсад кьилиз акъудзава.
— Гзаф лезгийриз хайи чIал, тарих чизвач. Къе интернетда лезгийривай менфят къачуз жедай затIар хьун гзаф важиблу я, — лугьузва Орхана.
Милли медениятдал, чIалал, тарихдал кьарувалзавай ватанэгьлидихъ сагъвал ва гьар са карда зурба агалкьунар хьурай!
Куругъли Ферзалиев
