Гьуьрметлу редакция!
Заз жуван ва хизандин патай лезги кьегьал хва, меценат Имам Яралиеваз чи играми газетдин чинилай рикIин сидкьидай сагърай лугьуз кIанзава. КIварчагъа, зи хуьруьнви, аял вахтунин дуст рагьметлу Мевлидинан хва — дуьньядин чемпион, боксер Аллагьвердиев Гьабибан тIварунихъ яна, зурба спорткомплекс эцигай ва ам шад гьалара ачухунин мярекат кьиле тухвай Имам стха сагърай! Аллагьди Квез чандин сагъвал, хизанда хушбахтвал артух, лезги халкь патал ийизвай хъсан кIвалахриз мадни шегьре рехъ ачух хьурай! Чахъ лезги чилин, хайи халкьдин къадир авай, лезги иви квай вун хьтин кьегьалар гзаф хьанайтIа, гьикьван хъсан жедай! Куьн лезги халкьдин дамах тирди мад сеферда субут хьана. Аферин ва баркалла!
Къурушрин кьве хуьруьн агьалийрихъ, агъсакъалрихъ, интеллигенциядин векилрихъ, кьиле авай ксарихъ элкъвена, теклиф гуз кIанзава: Имам стха Къурушрин кьве хуьруьн лайихлу агьали яз кьабулин. Ада чи хуьрерин спортдин рекье агалкьунар къазанмишзавай жегьилриз ийизвай майилвал чна — хуьруьнвийри — рикIелай ракъурна виже къведач.
Къуй халис ватанпересар чахъ мадни гзаф хьурай!
Шихали Багъиров
