4-июлдиз “Дагъустан” РИА-дин майдандал “Ачух власть” проектдин сергьятра аваз  РД-дин печатдин ва информациядин министр  Рашид  Акавов регионрин СМИ-рин векилрихъ галаз гуьруьшмиш хьана.

Ведомстводин кьили журналистриз министерстводин кIвалахдин нетижайрин гьакъиндай ва  Дагъустандин печатдин министерстводин вилик акъвазнавай важиблу месэлайрикай суьгьбетна.

Кьилди къачуртIа, ада малумарна хьи, ведомстводиз табий тир идарайрин чIехи пай цIийикIа туькIуьр хъувунин гьалда ава. “Финансрин рекьяй четинвилер авай шар­тIара масс-медиа патал­ четин вахт я. Ам­ма чи газетри, журналри ва телевиденидин каналри вилик акъвазнавай вири месэлаяр тамамдаказ кьилиз акъудзава”, — лагьана Акавова.

Ведомстводин кьили кьетIен фикир милли чIаларал акъатзавай газетрин векилриз гана: “Им Дагъустандин культурадин ва литературадин са жуьредин къизилдин фонд я. Абур тамамдаказ хайи чIал чизвай ксар я. Уьлкведин жуьреба-жуьре регионрин амадагривай Дагъустандин газетар Интернетда зайифдаказ къейднава лугьудай гафар мукьвал-мукьвал ван жезва. Исятда чун милли газетриз сетда чка жагъуриз чалишмиш жезва. Интернет-майданда хсуси контент вилик тухун патал хейлин фикирар ийизва. И кар патал чна тайин уьлчме туькIуьрнава, абур къведай йисалай интернетда анжах государстводин  тапшуругъ милли сегмент вилик ту­хун патал кардик кутада”, — малумарна ведомстводин кьили.

Пресс-конференция кьиле физвай вахтунда, гьакIни  кIелзавайбурув газет ахгакьаруниз талукь важиблу месэлайризни килигна. Рашид Акавова гъавурдик кутурвал, и месэладал ада гуьзчивалзава ва  ам гьялун патал къунши республикадин амадагрин тежриба ишлемишда. “Кеферпатан Осетияда и месэла гьялун патал сенаторди иштиракна ва аниз Москвадай Россиядин Почтадин векилар гъана. Чнани федеральный собранидин чи депутатривай и месэладиз фикир гун тIалабзава”, — къейдна министрди.

Дагъустандин журналистар патал чир­ви­лерин курсар гележегдани кьиле тухудани лагьана вугай суалдиз жаваб гуналди, Р.Ака­вова хабар гайивал, ихьтин практика давамарда  (виликрай РД-дин печатдин министерстводи СМИ-рин векилар патал семинар Интернетда кьиле тухузвай).