4-июлдиз райадминистрациядин залда райондин активдин нубатдин совещание хьана. Сифте гаф рахуналди, ам «Ахцегь район» муниципалитетдин кьил Осман Абдулкеримова ачухна ва кьиле тухвана.
Совещание налогар кIватIунин ва чилерни капитальный эцигунар (ОКС) актуализироватунин месэладилай эгечIна. Ахцегь муниципалитетдин экономикадин отделдин пешекар Фатима Агьмедовади, кьилди къачуртIа, къейд авурвал, райондин йисан паюнин налогрин пландин тапшуругъар эменнидай 77 ва чилин налогдай 91 процентдин тамамарнава. Калукрин, КьакIарин ва Хинерин СП-яр квачиз амай хуьрерин администрацийри чпин планар ацIурнава. Капитальный эцигунрин (ОКС) ва чилер актуализироватунин гьакъиндай тапшуругъар тамамаруни, талукь тирвал, 57 ва 61 процент тешкилзава.
— Инсанри чпин налогар вахтунда гун тавунин, гьакI газет-журнал подписка тавунин себебрикай сад къуллугъчийрин мажибдин пулар карточкайриз ягъун хьанва. Амма им кьабулиз жедай себеб-багьна туш, — алава хъувуна депутатрин райсобраниедин председатель Абдулкерим Палчаева.
Ахцегь муниципалитетдин кьилин заместитель Алмас Шуаев лезгийрин «Шарвили» эпосдин сувариз гьазурвилер акунин месэладал акъвазна. «Малум тирвал, эпосдин 18-сувар чна районда 29-июлдиз тухузва. Им са Ахцегьрин ваъ, чи вири халкьдин багьа сувар я ва гьавиляй ам хъсан тешкиллувал аваз тухун патал гьазурвилин кIвалахар активламишна кIанда», — къейдуналди, ам суварин программадин кьилди-кьилди серенжемрал тамамдиз акъвазна. Залдавайбурун дикъет ада иллаки майданар тешкилунин, общественный хатасузвал ва, лазим атайтIа, медицинадин къуллугъ таъминарунин, жемятдиз тIуьн-хъун ва ял ядай мумкинвал гунин месэлайрал желбна.
Совещаниедал гьакI подпискадин, чахутка азардин вилик пад кьун патал 7-июлдиз РДК-дин залда районрин арадин совещание тухунин гьакъиндай А.Шуаева малуматар авуна. Хуьруьн майишатрин агропаспортар туькIуьрунин (УСХ-дин начальникдин куьмекчи Ханлар Рамазанован малумат), районэгьлияр госуслугайрин, ЭЦП-дин ва ЖКХ-дин порталра регистрация авунин (муниципалитетдин умуми отделдин начальник Алимирза Османован малумат), идарайра электроэнергия ишлемишунай галамай пуларин буржар вахгунин (финуправлениедин начальник Анвар Мирзоеван малумат), 2018-йисуз РФ-дин Президентдин сечкийриз гьазурвал акунин (райондин ТИК-дин председатель Байрам Бабаеван малумат) месэлаярни веревирд авуна.
Эхирдай райондин кьил О.М.Абдулкеримова СП-рин кьилериз ва идарайринни карханайрин руководителриз налогар кIватунин, «ЦIийи дуьнья» ва «Лезги газет» кхьинин, «Шарвилидин» сувариз гьазурвилер акунин жигьетдай талукь тир тапшуругъар гана.
