Чи ватанэгьлияр — гьар сана
Чи халкьдин жегьил векилрин арада регьбервал гудай жавабдар къуллугъар кьилиз акъудзавайбур Россиядин жуьреба-жуьре шегьерра тIимил авач. Вичин ери-бине Хив райондин Цналрин хуьряй тир, 1992-йисуз Екатеринбург шегьерда карчидин хизанда дидедиз хьайи Вадим Алиевич Алиевни тежрибалувилелди къуллугъдин рекьяй вини дережайриз хкаж жезвай ватанэгьли я. Чаз малум хьайивал, алай вахтунда ада Томскдин областдин УФАС-диз регьбервал гузва.
2009-йисуз шегьердин 165-нумрадин мектеб куьтягьна. Ругуд йисан яшда авай чIавалай Вадим спортдин махсус мектебда мини-футболдал машгъул хьана. Са шумуд сеферда ам акъажунрин лап хъсан футболист яз тестикьарна, 1992-йисуз дидедиз хьайи жегьилрин арада ада чемпионвилин тIварни къачуна. Алай вахтунда ам футболдин рекьяй спортдин мастервиле кандидат я.
Мектебда кIелзавайла, кьетIен чирвилер къачурвиляй ада кьве вуз агалкьунралди куьтягьна: 2014-йисуз “Государственное и муниципальное управление” пешедай Россиядин сад лагьай Президент Б. Ельцинан тIварцIихъ галай Уралдин федеральный университет ва 2018-йисуз юриспруденциядин хиляй Уралдин гьукуматдин юридический университет.
Сад лагьай кьилин образование къачур 2014-йисалай ада антимонопольный органра кIвалахзава.
2015 ва 2018-йисара конкуренциядин азадвал таъминарунин ва карчивилин хел хуьниз талукь яз нетижалудаказ кIвалахунай ам Россиядин ФАС-дин (Федеральная антимонопольная служба) чугъсагъулдин чарчиз, 2020-йисуз и къуллугъдин 30 йис тамам хьунихъ галаз алакъалу яз махсус медалдиз лайихлу хьана.
КIвалахунин ашкъи ва хъсан чирвилер аваз зегьметдин рехъ башламишай жегьил къуллугъчиди са куьруь муддатда вич алакьунар ва виликди фидай мумкинвилер авай пешекар тирди тестикьарна. Кардив рикI гваз эгечIзавайвиляй адал 2020-йисан ноябрдиз жавабдар къуллугъ — Россиядин ФАС-дин Томскдин управленидин регьбердин заместителвал ихтибарна. Регьбервилин ерияр хас тир пешекар алай йисан апрелдин вацра къуллугъдин гурарай мад са кIарцIин виниз хкаж хьана — Томскдин областдин УФАС-дин кьил яз тайинарна.
В.Алиева Россиядин ФАС-дин чирвилеринни методикадин центрада мукьвал-мукьвал пешекарвилин дережа хкажзава. Гьар мумкинвал, азад вахт хьайила, ам бубайрин ватандизни хквезва.
Адан чIехи стха Артура Уралдин медакадемия акьалтIарна, гьана пешедин рекьяй кIвалахзава.
Гьина аватIани, гьар са ватанэгьлидихъ чандин сагъвал ва кIвалахда еке агалкьунар хьурай!
К.Ферзалиев
