Лезги миллетдин векилрикай вичихъ хъсан гележег авай спортсменрикай сад тир Жабраил Гьажиева дуьньядин кесерлу майданра вичин устадвал къалуруникай чна газетда са шумудра малуматар ганай. Вичин ери-бине Ахцегьай тир кьегьал алай вахтунда Азербайжандин командадин патай экъечIзава. Са шумуд югъ идалай вилик Уфа шегьерда 21 йисал къведалди яшара авай жегьилрин арада кьуршахар кьунай дуьньядин кIвенкIвечивал патал кьиле фейи акъажунра Жабраил Гьажиев (70 кг-дин заланвал авайбурун арада) гимишдин медалдиз лайихлу хьана.
Дуьньядин кесерлу майданра гимишдин медаль къазанмишунни, шаксуз, еке агалкьун я. Амма гьайиф къведай кар ам я хьи, ярумчух финалда Станислав Свинобоевахъ галаз бягьсина, 6:1 гьисабдалди гъалибвал къазанмишуналди, финалдиз акъатай чи ватандаш Ирандай тир Эрфан Элахидиз анжах са очкодин тафават аваз (5:6 гьисабдалди) кумукьна. Гьар са кардихъ хъсанвални ава. Имни чи спортсмен гуьгъуьнин акъажунриз вичин къуватар, устадвал мадни хкажнаваз майдандиз экъечIун истемишзавай имтигьан я. Бажарагълу тренер Вагьид Мамедован гуьзчивилик кваз гьар юкъуз чIугвазвай зегьметди мадни хъсан бегьерар гъидайдак умуд кутазва.
«Лезги газет»
