“Лезги газетдин” редакциядин почтадиз са тIимил вахт идалай вилик агъадихъ галай манадин чар атана.
“Зун гьамиша “Лезги газет” кхьизвай ва кIелзавай инсан я. Амма газетрин чинрай эхиримжи вахтара чаз критикадинни арзайрин макъалаяр тIимил аквазва. Чидач, инсанрин кIвалахар вири туькIвенватIани, “чIемяй ятIани”, тахьайтIа, кхьинрикай хийир авач, кIвалахар, гьикI хьайитIани, чпиз кIанивал ийидайвал я лугьузватIани.
Гзаф вахтара газетрин чинрай, радиодай (мад телевизордикай рахамир) гьа са гафар лугьуда — законар дегиш хьанва, халкьариз регьятвал хьун паталди гьукуматди вири жуьредин такьатар жагъурзава, иллаки — 2-3 аялар галай жегьил хизанриз.
Дидевилин капитал ва ипотекадин кредитдай гузвай кьезилвилер чи хуьруьн жегьилривай ишлемишиз жезвач. Себеб вуч я лагьайтIа, хуьруьз статус авач лугьузва ва “зеленкаяр” ийиз жезвач. Хуьре кIвал маса къачун ва эцигун патал “зеленкаяр” герек къвезвайди сир туш.
Зун Кьурагь райондин Бугъдатепе хуьруькай рахазва. Ина 200-далай виниз кIвалер ава. Агьалийри чилерин ва кIвалерин налогар гузва, хуьре администрация, юкьван школа, спортдин еке комплекс, ФАП, аялрин бахча, клуб, библиотека… кардик ква. Аквазвайвал, ина яшайишдин вири объектар ава. Бес хуьруьз статус авачирла, и вири идараяр ва кIвалер цавара авани?
Гьукуматди гузвай кьезилвилер ишлемишиз тахьайла, жегьилар патарал физва. Идахъ галаз алакъалу яз, школадиз физвай аялрин кьадарни йисалай-суз тIимил жезва.
Чи мурад и кIвалах гъиле кьун, хуьруьз статус гун патал вуч ва и кардал вуж машгъул хьун герек ятIа чирун, куьмекун я.
Чи багъри “Лезги газетди” и кардик къуьн кутуник, и месэладай кьил акъудуник чна кIевелай умуд кутунва.
Сагърай!
Бугъдатепедин жегьилрин мецелай арза кхьейди Исрафилов Хидирнеби я”.
Редакциядин патай.
Жегьилрин арзадай кьил акъудун патал чна Кьурагь райондин администрациядиз зенгна. Сифте чун администрациядин кьилин заместитель Махач Гьажикъурбанович Хариевахъ галаз рахана. Ада гъавурда турвал, виликдай мал-къара хуьн патал чара авунвай чилерал агьалийри яваш-яваш кIвал-югъ кутуна. ИкI, Кьурагь райондин са шумуд хуьр — Аладаш, Маллакент, Къумух, Бугъдатепе арадал атана. Къенин юкъуз амай хуьрерин месэла гьялнава. Амма Кьуьчхуьррин хуьруьн советдик акатзавай кьведахъ -Кьуьчхуьррихъ ва Бугъдатепедихъ статус хьанвач… И месэла Дагъустандин чилерин ва эменнидин алакъайрин рекьяй министерстводин къаюмвилик ква. Амма месэла четинарзавай кIвалах ам я хьи, эхиримжи вахтара ина са шумуд министр, гьатта са вацралай артух вахт виликни мад сад, дегиш хьана. Месэладал сакIани кIукI гъиз жезвач…
Гуьгъуьнлай чун (Махач Хариеван меслятдалди) и месэладин патахъай райондин экономикадин ва эменнидин алакъайрин рекьяй отделдин начальник Идрис Муслимовахъ галаз рахана. Ада чаз агъадихъ галай жаваб рекье туна:
“Кьурагь райондин администрацияди райондин хуьрерин мулкар вилик тухунин макьсаддалди Кьуьчхуьррин хуьруьн советдик акатзавай мулкар вилик тухунин генеральный план ва чилер ишлемишунин, анрал эцигунар авунин къайдаяр махсус фирмадихъ галаз туькIуьрнавайдакай хабар гузва. Алай вахтунда винидихъ тIвар кьунвай документрай халкьдин вилик яб акалунар (публичные слушания) ва веревирдер куьтягь хьанва. Документ Дагъустан Республикадин лазим министерствойрихъ ва къуллугърихъ галаз разивал къачун патал (для согласования) рекье тунва. И кIвалахар акьалтIайла, гьакI РД-дин Россреестрдин органра ва Кадастровый палатада хуьруьн сергьятар кIвачихъ гилигайла, агьалийривай чилер кадастровый учётда эцигиз ва государстводин сад тир ихтияррин реестрдай (ЕГРП) акъуднавайвилин выписка къачуз жеда”.
Идрис Муслимован гафарай мадни малум хьайивал, и крар кьилиз акъудун патал (сифтедин тамам тушир вахт яз) алай йисан 1-август къалурнава. Идалайни гъейри, месэла Кьурагь райондин кьил Замир Азизован гуьзчивилик ква. Ам Кьуьчхуьррин хуьруьн советди кьилин фикир гузвай месэлайрикайни сад я. ИкI, и мукьвара Кьурагь райондин администрацияда, РД-дин Халкьдин Собранидин депутат Сейфулагь Исакьован иштираквални аваз, Дагъустандин Кьилин Чар веревирд авуниз талукь мярекатдални и месэла къарагъарна. С.Исакьова адан патахъай чалишмишвилер авун хиве кьуна.
