Гьуьрметлу “Лезги газетдин” редакция!

Квез кагъаз кхьизвайбур Ахцегь райондин Луткунрин хуьруьн агьа­лияр я. 2018-йисан 15-ноябрдиз акъатай “Лезги газетдин” 46-нумрадин 6-чина Алибегова Бикехалуман “Гъилик — бере­кат, кIва­че­рик — гьере­кат” макъала ганва ва Ахцегь рай­ондин Ка­лукрин хуьряй тир Аб­ду­се­ли­мов Абдуселиман бегьем тарифарнава. Ма­къала вири чаз, луткун­вийриз, талукь туш, амма чи, луткунвийрин, кIвале­риз А.Абдусели­мова газ гъана, чун шадарнава лугьуз тапарар авунилай Луткунрин же­­мят гзаф нарази я. Мадни бязи ксарин кIва­лериз А.Абдуселимова пулсуз газ гъанва­ лагьанва.

Луткунрин жемятдин  тIварцIелай тапарар ийимир. Эгер кардин кьил чириз кIанзаватIа, месэладин бине ихьтинди я. 2014-йисуз Ахцегь­ райондин кьил Абдулкеримов Осман Магьмудович гьа Абдуселимов Абдуселимни галаз чи хуьруьз атана, соб­рание кIватIнай. Жемятдиз чпи 11000 манатдихъ  гьар кIвализ газ гъида лагьана, хиве кьуна. Пул кIватIун патал инсанарни тагькимарна. Идалди а 11000-дан дуван куьтягь хьана. 2016-йисуз газ гъунин харжийрин къимет 46000 манат­дал гъана. Алай вахтунда  гьар са касдин кIвализ газ гъунин къимет  86000 манатдал гъанва, цIийи йисалай къимет 134000 манатдал гъида­ лагьай хабарни агакьнава. Газ хуьруьз гъизвайди А.Абдуселимов туш, адан гададин хсусиятда авай “Грин — Вилл” ООО, къиметарни гьар са кIвализ гъун патал 76000 манат ва гьадалайни виниз я. 50000 манат ООО-ди вичиз  къачузва, 26000 манат газ кутун патал абурун векил Магьарамов Ширинбега. Агьалийриз 27000 манатдин квитанция гузва­, амай пул… Газдин турбаяр куьгьнебур, иш­лемишнавайбур я. Газни къад чкадай ахъайзава, ширни пара паюниз янавач. Линиярни къайдасуз­даказ тухванва. Кьилин проект чIурна, виниз тир газдин турба вахтуналди аэродромдин чилелай гъанва­.

Са кIвализни “Грин-Вилл” ООО-ди газ пулсуз гъанвайди туш. Ма­­къа­лада тIва­рар кьунвайбурни ООО-дин векилрин мукь­ваяр я. Бел­ки, абу­руз­ газ гъидайла, кьезилвал авуна жеди. КIвале цIуд бицIи ба­ла авай Эю­бов Салаватавай, гьакI масадбурувай 86000 манат тIа­лабзава, газ­дин турба кIвалин виликай фенвай, инвалид гъвечIи аял авай Рам­а­занов Эмируллагьавай 76000 манат пул къачунвай­бу­рун­ тарифар ийиз, чи газет беябурзавай Б.Алибеговадиз туьнбуьгь ая.

Луткунрин хуьре хуьр газдалди таъминарунин месэлайриз талукь­ яз кьве соб­рание кьиле фена. 2018-йисан 18-октябрдиз халкьдин тIала­бунриз килигна кIва­тIай хуьруьн жемятдин собранидал я хуьруьн кьил А.Рагьимов, я райондин администрациядин векилар садни пайда хьанач. “Грин-Вилл” ООО-дин патайни са касни атанач.

Инвесторди (“Грин-Вилл” ООО) газ­дин­ турбаяр гьар са магьледиз­, гьар са куьчедиз, вичин эменнидихъ гъун лазим я, газ тухузвай кIвалин иесиди вичин пулунихъ кIвалинни гьаятдин мензилдин патахъай жаваб­ гана кIанзава. Вад метрдилай виниз хьайи­тIа, гьакIни галкIу­ру­нин пул мензилдизни газ кудай точкайриз килигна гуда, 25886 манатдилай виниз тушиз. Алава артух пулар къачуз хьайитIа, соинвесторвиле икьрарар кутIунда ва квитанци­яр кхьида, гуда. ИкI хьайила, пул гайи касни турбадин паюнин хсуси иеси жеда, соинвестор яз.

Инвесторди вичин хийир кесиб халкьдин техвяй фтIинна кIандач, ада вичин турбайрай газ ракъурунай газ маса гузвай идарадивай я транзитдин, я ижарадиз вугана, гьахъ къачуда.

И къайда закондал асаслу я, амай кIвалахар вири уюнбазвилер я. Вири хуьрериз газ гьавайда гъайила, Луткуниз пулунихъ, квитанцияни тагуз, вучиз гъизва?

Гуьгъуьнлай, 2018-йисан 11-ноябрдиз Луткуна мад собрание хьана­. Мярекат хуь­руьн регьбер А.Рагьимова тухвана. Анал А.Абдуселимо­в­ ва адан векиларни алай. Винидихъ къейд авунвай вири суалар адав ву­­гана. Са суалдизни а касдивай дуьздаказ жаваб гуз хьанач. Б.Алибеговади ада бязи инсанриз газ гьавая гъанва лугьузва. 2014-йисуз 17000 манат пулар къачунвай И.Хуршидоваз ва Х.Хуршидоваз къени газ гъанв­ач. Вучиз лагьай­тIа, пулар тIалабиз атайла, квитанцияр це ла­гьана лугьуз. Мискискарин хуьруьз газ гьавая, Махачкъала шегьерда­ цIийи хсуси­ кIвализ 18000 манатдихъ гъайила, чаз, лут­кунвийриз, ву­­­чиз 86000 манатдихъ гъизва?! ЦIийи йисалай газ гъунин къимет 134000 манатдиз акъудзава лугьуз кичIерарни гузва. 2018-йисан 18-ок­тябрдиз ва 11-ноябрдиз кьиле фейи собранийрал икьрар хьайивал газ гьар са кIвализ 29000 манатдихъ гъиз хьайитIа, “Грин-Вилл” ООО-див­ хуьре газ гъунин кIвала­хар давамариз тада, тахьайтIа, ам хуьряй­ акъудна, маса инвестор теклифунин къарар кьабулнава.

Максумов  М.К.

Азимов  Я.А (вири 18 касдин къулар ала).

Редакциядин  патай

“Лезги газетдин” редакциядиз гьар гьафтеда республикадин жуьреба­-жуьре пипIерай чи газетдихъ галаз алакъа хуьзвай ксари макъалаяр­, оче­р­кар, зарисовкаяр… рекье твазва. И материал­ра гъизвай делилрин, ре­­къемрин гьакъикъивал, дуьзвал газетдин къуллугъчийривай тамамдиз­ чи­­риз жезвач. Сад лагьайди, им фикирдиз гъиз жедай кар туш, гьикI л­а­­­­гьай­тIа, гьар са макъа­ладин гьакъикъивал­ чирун патал редакциядин къул­лугъчийри и хуьруьз, а хуьруьз физ ахтармишунар кьиле тухвана кIан­ жез­ва­. Кьвед лагьайди, им редакциядин къуллугъчийрин везифани туш.

Тайин са макъалада гъизвай делилрин, рекъемрин, инсанрин­ тIва­рарин, фамилийрин ва маса месэлайрин гьакъикъи­вилин па­тахъай жавабдарвал автордин хиве ава. И кар Россиядин СМИ-риз талукь къанундани къейднава.

Гьелбетда, гьакъикъатдив кьан тийизвай делилар газетдин чи­­нал атун редакция патал хъсан кар туш. И кар фикирда кьуна, ин­лай кьулухъ­ тапан делилар авай макъалаяр редакциядиз рекье­ тур, газетдиз акъудай авторрин материаларив кьетIендаказ эгечIда­.

Чна газетдин редакциядиз макъалаяр рекье твазвай гьар са касдивай­ материалра къейдзавай делилрин, рекъемрин гьакъи­къивилив жавабдарвилелди эгечIун тIалабзава.

Луткунрин жемятдилай атанвай чарче­ къарагъарнавай месэ­ладай кьил акъу­дун редакцияди Ахцегь районда авай чи хсуси­ мух­бир Дашдемир Шерифалиевал тапшурмишна. Ада редакция­див и месэладиз талукь пуд документ (чарар) агакьарнава. Абурай малум жезвайвал, Луткунрин хуьруьз талукь месэла гьялун­ суддин хиве ава. Документар (чарар) агъа­дихъ чна кIелзавай­бу­рун фикирдиз гъизва.

___________________________________________

Бабаева  Радмиладиз, Махачкъала

Арзадиз килигунин нетижайрин справка

2018-йисан 17-январдиз “Ахцегь район” МР-дин администрациядин тIварцIел, райондин Калукрин хуьр газдин турбадихъ галкIурдайла “Грин-Вилл” ООО-дин директор А.С.Абдуселимова рехъ ганвай къайда чIурдай дуьшуьшрин гьакъиндай арза атана.

“Грин-Вилл” ООО-дин ихтиярар чIур­завай гьере­катрилай Куь арзадиз килигунин  нетижада “Ахцегь район” МР-дин администрацияди гъавурда твазва:

Ахцегь райондин Калукрин хуьре тухванвай газдин турбайрин сетрин иеси “Грин-Вилл” ООО ва, кьилди къачуртIа, адан руководитель А.С.Абдуселимов я. Ада, хуьрер газламишунин проектдал­ би­неламиш хьана, Калукрин хуьре газдин тур­бадин сетар туькIуьрна. И кар­ханади кьилди гьа­къи­дихъ герек тир вири документация гьазурунин, экспертиза авунин, Калукрин хуьряй газдалди таъминардай  турба тухунин (монтаж), гуьнгуьна твадай подстанцияр (шкаф) тайинарунин ва газдин турба РФ-дин Гостехнадзордин ве­кил­див вахкун патал лазим амай вири кIва­лахар тамамарзава. Ахцегь райондин администрациядин и жуьредин кIвалах­рихъ галаз са алакъани авайди туш ва магистральный турбадик галкIурунин кIвалах­риз ийизвай харжийрин гьакъиндай делилар авач.

Амма агьалийрин патай гзаф кьадар арзаяр­ атун себеб яз, муниципальный райондин адми­ни­страцияди 2018-йисан 2-октябрдиз актовый залда  агьалийрин ва  газдин къуллугъдин руководителдинни “Грин-Вилл” ООО-дин директордин гуьруьш тешкилнай. Анал жемятди газдин турбадихъ галкIу­­­рун патал “Грин-Вилл” ООО-ди тайинарнавай къи­метрилай наразивал малумарнай. Веревир­де­рилай кьулухъ “Грин-Вилл” ООО-дин директор Аб­дусе­ли­мова гъавурда турвал, Луткунрин хуьр газлами­шунин  кIвалах гъиле кьадалди вилик чкадин акти­вистрихъ, карчийрихъ, агъсакъалрихъ галаз гуь­руьш­ хьайиди тир ва анал государстводи мукьвал тир вахтунда и хуьр газламишун фикирда кьун та­вунвайдакай лагьанай. “Грин-Вилл” ООО-ди­ вич проектдинни сметадин документация туь­кIуьрунин ва хуьруьв виниз тир гужлувал авай газд­ин турбадин линия агакьарунин кIвалахар тама­мариз гьазур тирдакай ла­гьана. Хуьр тамамда­каз газламишун патал чкадин агьалийрин иштирак­вални лазим я. ИкI, хуьр тамамдаказ газламишун патал гьар са кIвалелай 11 500 манат кIватIдай къарар кьабулна.

2014-йисалай “Грин-Вилл” ООО и хуьр газлами­шунин кIвалахрив эгечIна. Винидихъ вичикай ла­гьан­вай кьадар пул кутур вири кIвалер гуьгъуьнлай газдин  турбадин линиядихъ гал­кIурна. Вахт алатай­ла, турбадихъ галкIуру­нин къиметни, талукь яз, хкаж хьана. И кардин се­­беб, директорди хабар гайи­вал, материалар ба­гьа хьунихъ ва пул къуватдай аватунихъ (ин­фляциядихъ) галаз алакъалу я. Пулдин такьатар агакьарай гьар са кIвалин иесидив  муьгьуьр алай квитанция ва икьрар вугузва.

Газдин турбадихъ галкIурунин къимет, идалай вилик квай йисарив гекъигайла, лап виниз хкаж хьанвайди ва чкадин агьалийрихъ ихьтин такьатар­ авачирди фикирда кьуна, райондин руководстводи Абдуселимоваз кьабулиз жедай къимет тайина­рун ва агъузардай коэффициент ишлемишун са шумуд сеферда теклифнай. Кьилдин инвестор тир А.Абдуселимова къенин йикъалди тестикьарза­вай­вал, ам сетдин асул або­нент, яни и ли­ниядин ие­си я ва хуьр газламишунихъ галаз ала­­къа­лу ви­ри харжияр анжах адан хсуси такьатрихъ тама­марза­ва, талукь яз, адаз, хсусиятчидиз хьиз, газдин тур­­бадихъ гал­кIай пуд лагьай терефди газдин турба тухунихъ­ (цIийикIа туькIуьр хъувунихъ) галаз ала­къалу харжияр эвез хъувун лазим я.

Идалайни гъейри, “Ахцегь район” МР-дин администрацияди райондин агьалийрин ихтиярар хуьн патал Ахцегь райондин прокуратурадиз “Грин-Вилл” ООО-дин гьерекатрин законлувал ахтармишун, кьилди къачуртIа, къиметар хкажунихъ бине авани, авачни чирун тIалабза­вай чар ракъурнава. И чарчин гелеваз тухвай ахтармишунин нетижада  Ахцегь райондин прокуратуради хабар гайивал (05,02.2019-йисан чар, №22ж-2019), и месэладиз талукь яз, яни къиметрилай нарази яз чкадин агьалийрилай атанвай арзадин чарар, процессуальный къарар кьабулун патал  МВД-дин УЭБ-дин  ва ПК-дин­ районрин уртах  отделдиз (ам Дербент шегьерда ава) рекье тунай.

Ахтармишунин нетижада “Грин-Вилл” ООО-дин руководитель уголовный жавабдарвилиз чIугун патал себебар жагъанвач.

Газдин турбадихъ галкIурунин къиметар хка­жу­нин месэла суддин къайдада гьялна кIан­да, гьикI лагьайтIа, ам агьалийринни карханадин арада хьанвай гьуьжет я.

19.02.2019

_______________________________________

Ахцегь райондин прокуратурадиз

Ахцегь райондин Луткунрин хуьр газламишунин кIвалахар хсуси ва агьалийрин такьатрин гьисабдай инвестор “Грин-Вилл” ООО-ди кьиле тухванва. Карханадин руководитель С.А.Абдуселимов. Алай вахтунда ам и хуьре газдин турбаяр ту­хунал машгъул­ тек са фирма я.

Эхиримжи вахтара “Ахцегь район” МР-дин администрациядиз Луткунрин хуьруьн агьалийрилай ви­нидихъ тIвар кьунвай карханадин хсусият­да авай газдин турбадихъ галкIурунин къиметар лазим­ кьадардилай виниз хьанвайдан гьа­къин­дай арзадин чарар къвезва. Агакьнавай арзайрай малум жезвайвал, газдин турбадихъ гал­кIу­рунин къимет ви­ле акьадайвал хкаж хьанва. Ида­лай вилик, 2014-йисуз, ам цIусад агъзурни вад виш манатдиз (11 500) барабар тиртIа, алай вахтунда къимет кьуд сефердилай гзаф хьанва ва яхцIурни цIуд агъзур манат (50 000) тешкилза­ва. Къимет садлагьана хкаж хьуни хуьре­ гьалар къизгъин хьунал гъанва, жемятдин арада гьу­же­тар кьиле физва.

Къиметар хкажунин себебар чирун патал ­“Ахцегь  район” МР-дин администрацияда хуьруьн агьа­лийрин, газдин къуллугъдин руково­дителдин ва “Грин-Вилл” ООО-дин директордин иш­тираквал  аваз  гуьруьш тешкилнай. “Грин-Вилл”­ ООО-дин  ди­ректордин  гафаралди,  къиметар  хкаж хьунин асул себеб ишлемишзавай материалар багьа хьун  ва пул къиметдай аватун (инфляция) я.

Алава яз хабар гун, районда газдин сетар иш­лемишунал машгъул къуллугъ ава, абуру тамамар­завай кIвалахрин, кьилди къачуртIа, проектдинни сметадин документация гьазурунин, технологи­ческий галкIу­рунин, эцигунринни туькIуьрунин кIва­­лахрин, проектдал разивал къачунин, дегишвилер кутунин къимет, санлай къачурла, 25-30 агъзур манатдай акъваззава (тестикьарнавай тарифрин сетка).

Идахъ галаз алакъалу яз, “Ахцегь район” МР-дин администрацияди  Квевай  “Грин-Вилл” ООО-дин  гьерекатрин  законлувал ахтармишун, кьилди къачуртIа, къиметар хкажунихъ бине авани, авачни чирун тIалабзава.

“Ахцегь район” МР-дин кьилин везифаяр вахтуналди тамамарзавай  М.Х. Гъаниев

27.11.2018

_______________________________________________________

“Ахцегь район” МР-дин кьил О.М.Абдулкеримоваз

Ахцегь райондин Луткунрин хуьре кIвалер газдин турбадин линиядихъ галкIурунин къиметар хкажунихъ галаз алакъалу яз “Грин-Вилл” ООО-дин гьерекатрин законлувал ахтармишунин гьа­къин­дай Куь арзадиз килигнава.

И месэладиз талукь яз, яни къиметрилай нарази яз чкадин агьалийрилай атанвай арзадин чарар процессуальный къарар кьабулун патал МВД-дин УЭБ-дин  ва ПК-дин районрин уртах  отделдиз (ам Дербент шегьерда ава) рекье тунай.

Ахтармишунин нетижада “Грин-Вилл” ООО-дин руководитель уголовный  жавабдарвилиз чIугун патал  себебар жагъанвач.

Газдин турбадихъ галкIурунин къиметар хкажу­нин гьакъиндай гъавурда твазва, и месэла суддин къайдада гьялна кIанда, гьикI лагьайтIа ам агьалийринни карханадин арада хьанвай гьуьжет я.

“Грин-Вилл” ООО-ди газдин турбайрин сетар туькIуьрунин кIвалахар хсуси ва желбнавай та-кьат­рин гьисабдай, Калук, Луткун ва Чепер хуьре­рин агьалийрихъ, гьакIни и хуьрерин ва “Ахцегь район” МР-дин администрацийрихъ галаз мес­лят­на, разивал къачуна тамамарнай.

Тамамарнавай кIвалахрин еридин ва хуьрерин къенепатан сетрихъ галкIурунин (ишлемишиз вахкун тавунвайбур яз) законлувилин гьакъин­дай, пеше­каррин иштираквал аваз, талукь тир ахтарми­шунар тухудай къарар кьабулнава ва, къайда чIу­рай дуьшуьшар пайда хьайитIа, чна прокурор къаришмиш хьунихъ галаз алакъалу серенжемар кьабулда.

Райондин прокурор, юстициядин старший советник  Ш.Тагьирова

05.02.2019