И йикъара Мегьарамдхуьруьн райондин кьил Фарид Агьмедова образованидин идарайра медкабинетар тадаракламишунин ва лицензияр туькIуьрунин месэлайрай совещание кьиле тухвана.
«Лезги газетдиз» райондин администрациядин пресс-къуллугъди хабар гайивал, совещанида образованидин управленидин начальник Улубег Абейдуллаева, ЦРБ-дин кьилин духтур Гьажибала Беглерова, РД-дин Росплртебнадзордин Мегьарамдхуьруьн районда авай ТО-дин начальник Икрам Алиева, райондин администрациядин финансрин отделдин начальник Эдуард Ферзилаева иштиракна.
Совещание ачухуналди, райондин кьили гьар са мектебда медицинадин ерилу къуллугъдин кабинет кардик хьунин чарасузвал къейдна. Иштиракчийри идалай вилик медкабинетрин гьалар, абур авай чкаяр ахтармишай нетижаярни веревирдна.
Райондин кьил Ф.Агьмедован теклифдалди, медкабинетар тадаракламишун патал райондин бюджетдай 3 миллион манатдин кьадарда такьатар чара ийидай къарар кьабулнай. Алай вахтунда лагьайтIа, и такьатрикай 2 миллионни 300 агъзур манат чара авунва. Совещанидал вилик акъвазнавай месэла тамамвилелди гьялун патал вири месэлайриз фикир гана.
«Лезги газет»
