Йифен мугьманар

31-майдиз нянин сятдин 8-даз Къизляр шегьердин полициядин отделдиз 28 йиса авай са дишегьли арза гваз атана, 30-майдин йифиз Юбилейное хуьре авай вичин кафедиз малум тушир ксар гьахьна ва анай 20 агъзур манатдин недай-хъвадай шейэр чуьнуьхна лугьуз.

Полициядин къуллугъчийри кьабулай тади серенжемрин не­­ти­жада­ шак физвайбур тайинариз хьана ва абур полициядин отделдиз хкана.

Чкадин агьалияр тир кьуд касдини чпин тахсир хиве кьуна. Силис­чийри абур маса тахсиркарвилерихъ галаз алакъалу яни-тушни ахтар­мишзава. Шак физвайбурулай РФ-дин УК-дин 158-статьядин 2-паюнин бинедаллаз уголовный дело къарагъарнава. Тахсирлу ийизвайбур вад йисал къведалди азадвиликай магьрум авун мумкин я.

Иливнач

Къадим шегьердин 38 йиса авай угъриди пул къазанмишдай рехъ жагъурна. ИкI 22-майдин пакаман сятдин 8-даз ада Дербентдин Буйнакский куьчеда авай туьквендай 7000 манатдин шейэр чуьнуьхна.

Сивера тIям гьатай ам 2 сятинилай Пушкинан тIварунихъ галай куьчеда авай кафедиз фена. Инайни ада 6000 манатдин шейэр чуьнуьхна. Амма адаз иливнач. Полицейскийри кьабулай кар кьетI ийидай серенжемрин нетижада 27-майдиз угъривал  авунай шак физвайди тайинарна ва ам кьуна. Ада вичин тахсир инкарнач. Чуьнуьхай шейэрин са пай вахчуна. Шак физвайдалай РФ-дин УК-дин 158-статьядин бинедаллаз уголовный дело къарагъарна.

Угъри кьуна

30-майдин йифиз Махачкъаладин Нефтеперегонная куьчеда авай автотуьквендай са агьалиди 27 агъзур манатдин шейэр (планшет, запчастар) чуьнуьхна. Полициядин къуллугъчийри шак физвайди тайинарна ва кьуна. Ам 30 йиса авай шегьерэгьли яз хьана. Ада вичин тахсир хиве кьуна. Чуьнуьхай шейэр вахчунва. Уголовный дело къара­гъарна, алава ахтармишунар кьиле тухузва.

Къаршидиз къвезвай рекьиз экъечIуникди

28-майдиз Дербент райондин шегьреда “ЗИЛ-45065” маркадин машин гвай 27 йиса авай шофер къаршидиз (къаншардиз) къвезвай рекьиз экъечIна. Нетижада адан машин 41 йис хьанвай итимди гьалзавай “КамАЗ-65115” автомашинда акьу­на. “ЗИЛ-45065” автомашиндин шофер ва адан 21 йиса авай пассажир жуьреба-жуьре хирер алаз Дербент шегьердин больницада къаткурна.

Серенжемар кьабулун патал материал кIватIнава.

Маса гудайла

30-майдиз Махачкъалада тади гьалда гел жагъурдай се­ренжемар кьиле тухудайла, Акаеван куьчеда полицейскийриз кьве шегьерэгьлиди гзаф таъсир ийидай наркотик (трама­дол) маса гудайла акуна. Абур полициядин отделдиз  хкана­.

Тахсирлу ийизвайбурулай РФ-дин УК-дин 234-статьядин 2-паюнин­ бинедаллаз (гзаф таъсир ийидай наркотик маса гунай) уголовный дело къарагъарнава. Абуруз 5 йисал къведалди кар къвезва­.

Силисдин органирин материалрай

 Суддин вилик жаваб гуда

Дагъустан Республикадин силисдин органра РФ-дин УК-дин 105-статьядин сад, 30-статьядин 3-паюнин бинедаллаз (рекьидай къаст аваз) С.Уружевалай къарагъарай уголовный делодай силис тухвана куьтягьнава.

Силисди тайинарайвал, 2016-йисан ноябрдиз Махачкъалада Уру­жева­, вич кIвализ хутахунай пул гудайла, таксистдихъ галаз къал акъудна ва ам са шумуд сеферда гъутаралди ва чукIулдив яна. Гзаф кьадар хирер хьайи таксистдиз, вичин  машинда ахкьахна, катна хъфидай мумкинвал хьана.

Силисдиз Уружев тахсирлу ийидай бес кьадар делилар жагъанва. Уголовный дело суддиз рекье тунва.

* * *

Россиядин Федерациядин Силисдин  Комитетдин Дагъустанда авай силисдин органри Махачкъала шегьердин УМВД-дин Советский райотделдин ОУР-дин (отделение уголовного­ розыска) виликан оперуполномоченныйдилай уголовный де­ло къарагъарнава. Ам РФ-дин УК-дин 286-статьядин 3-паюнин­ “а” пунктунин (къуллугъдикай менфят къачуна, гужар авун) ва РФ-дин УК-дин 161-статьядин 1-паюнин бинедаллаз (таланчивал, тарашун) тахсирлу ийизва.

Силисдин делилрай, 2017-йисан январдин сифте кьилера­ вичикай­ суьгьбет физвай оперуполномоченныйди са шегьерэгьли са себеб­ни ава­чиз полициядин отделдиз хкана, адан жибиндай 5 агъзур манат пул акъудна, гьа са вахтунда а пул къачурвилин гьакъиндай документ — затIни кхьенач.

Идалай гуьгъуьниз шак физвайда полициядиз хканвайда­вай за­кон­суз наркотикар хуьзвайди хиве кьун ва я ам уголовный­ рекьяй жа­­ваб­дар­вилиз чIугун тавун патал 30 агъзур манат­ пул гун истемишна­. По­­­­­лициядиз хканвайда и кIвалах инкар авурла, оперупол­но­мо­чен­ный­ди, законлу са себебни авачиз, итимдиз вичин къуватар къалуриз баш­ламишна. И крарин гьахъ-батIулвал силисди вичин серенжемар тухудайла тайинарда.

Алай вахтунда уголовный делодай силис тухузва, тахсир квайбуру ахпа суддин вилик жаваб гуда.

Гьазурайди  — А.Гьамидов