“Дагстройэкспо-2017” выставкадихъ-форумдихъ галаз алакъалу мярекатар 6-июндиз республикадин “Дагъустандин правда» газетдин редакцияда кьиле фейи пресс-конференциядилай башламиш хьана. Регионрин уртах ва маса уьлквейрин карханайрин иштираквални авай эцигунринни архитектурадин махсус “Дагстройэкспо-2017” выставка-форум 7-8-июндин йикъара меркездин Р.Гьамзатован тIварунихъ галай Милли библиотекада кьуд лагьай сеферда кьиле физва.
“Эцигунрин комплекс Дагъустандин экономика виликди тухузвай асул хел я”, — малумарна РД-дин эцигунрин, архитектурадин ва ЖКХ-дин министрдин сад лагьай заместитель Мегьамед Османова саласа юкъуз журналистрихъ галаз хьайи гуьруьшдал.
Дугъриданни, республикадин эцигунрин комплекс эхиримжи вад йисан вахтунда неинки РД-да, гьакIни Кеферпатан Кавказдин регионда кIвенкIвечи чкадал ала. И хилез ийизвай инвестицийрин кьадарни эхиримжи йисара виле акьадайвал гзаф хьанва. Игьтияж авай чкада теклифни жеда лугьудайвал, эцигунрин материалрин базарни Дагъустанда булди ва жуьреба-жуьреди я лагьайтIа жеда. Гьа са вахтунда, и хилен еришар йисалай-суз дегиш, йигиндаказ виликди физвай Дагъустандин эцигунрин материалрин, техникадин базардиз чпин теклифар гваз экъечIиз кIанзавай карханайрин кьадар гзаф жезва.
“Дагстройэкспо-2017” выставка эцигунардай материалар акъудзавайбурун, проектар туькIуьрзавайбурун, и рекье информациядин алай аямдин технологияр ишлемишзавайбурун арада хуш рафтарвал, савдагарвилин алакъаяр хьун патал арадал гъанвай майдан я лагьайтIа, ягъалмиш жедач.
СРО “СКФО-дин эцигунардайбурун гильдия” Ассоциациядин президент Али Шагьбанова гьисабзавайвал, эцигунрин кIвалахрикай рахадайла, сифтени-сифте фикирдиз къвезвайди пешекар кадрийралди, ерилу материалралди ва технологийралди таъмин хьунин месэлаяр я. Выставка-форумди эцигунрин кIвалахар тамамарзавай ва материалар акъудзавай, и рекье цIийи технологияр туькIуьрзавай ксарин арада алакъаяр тайинариз куьмек гузва.
“Дагъустан- ЭКСПО” ВМЦ-дин директор Мегьамед Саругъланова суьгьбет авурвал, выставкадин сергьятра аваз тешкилзавай форумдал регионда эцигунардай хел виликди тухунин карда авай мумкинвилериз, эменнидин базарда авай гьалдиз, къецепатан уьлквейрай гъизвай эцигунардай материалар, техника ва тадаракар хсусибуралди эвезуниз, эцигунрин хиле инновациядин технологияр ишлемишуниз ва идалди ийизвай харжияр тIимиларуниз талукь месэлаяр веревирдда.
Выставкадин асул разделрик акатзава: дараматар эцигун; архитектура ва проектар туькIуьрун; эцигунардай тадаракар, производстводин технологияр; эцигунрин техника; эцигунардай ва алцумдай алатар; яшайиш патал лазим асул къулайвилер, целди таъминарун, канализация; индустрияда инновационный проектар; электротехникадин тадаракар; паркарин багъларин ландшафт; къав туькIуьрдай материалар; пенжерар, ракIарар, гурарар; гьава михьи ийидай системаяр, чими пол, пичер.
Ина Дагъустан Республикадин, Москвадин, Санкт-Петербургдин, Московский, Ростовский, Белгородский, Волгоградский, Челябинский областрин, Ставропольский, Краснодарский, Красноярский крайрин, СКФО-дин республикайрин, гьакIни са жерге маса регионрай тир 44 карханади-иштиракчиди экспозицияр ачухнава.
Жасмина Саидова
