27-февралдиз Кьурагьа спортдин дараматда РД-дин Муфтиятдин Кубок патал Кьиблепатан Дагъустандин жегьилрин командайрин арада волейболдай турнир кьиле фена. Райондин физический культурадин ва жегьилрин крарин рекьяй отделдихъ галаз санал тешкилнавай къугъунра Кьурагь, Мегьарамдхуьруьн, СтIал Сулейманан, Рутул, Дахадаев, Хив, Дербент, Ахцегь, Докъузпара районрай ва Белиж посёлокдай тир волейболистри иштиракна. Спортдин акъажунар ачухуниз талукьарнавай мярекатдал Кьурагь райондин кьилин заместитель Рамазан Катибов ва РД-дин Муфтиятдин Кьиблепатан территориальный округда (ЮТО) тамам ихтиярар ганвай векил Гьуьссейн Гьажиев рахана.
Турнирдин акъажунар пуд дестедик кваз кьиле фена. Ярумчух финалдиз Кьурагь, Докъузпара, СтIал Сулейманан ва Белиж посёлокдин командаяр акъатна. Нетижада Дагъустандин Муфтиятдин Кубокдин сагьиб Кьурагь райондин командадикай хьана. Белиж посёлокдин ва Докъузпара райондин командаяр, талукь тирвал, 2 ва 3-чкайриз лайихлу хьана. Алик Насрулаев (Кьурагь), Юнус Шугаибов (Белиж) ва Ризван Жаниев (Докъузпара) турнирда виридалайни хъсандиз къугъвайбур яз гьисабна.
Гъалиб хьайи командайриз кубокар, медалар, дипломар ва пулдин пишкешар гана. “Кьурагь район” МР-дин кьил Замир Азизова районда физический культура ва спорт вилик тухунай, гьакIни Дагъустандин агьалийрин арада сагълам уьмуьр пропаганда авунай РД-дин Муфтиятдин Кьиблепатан территориальный округда тамам ихтиярар ганвай векил Гьуьссейн Гьажиевав чухсагъулдин чар вахкана.
Чи мухбир
