ДГУ-дин Дербентда авай филиалдин ­волонтеррин “Хъсан кIвалахар ая” ­лишандик кваз тешкилнавай дестедини филиалдин муаллимри чкадин  агьа­лийрихъ галаз санал До­нецкдайни ­Луганскдай катуниз мажбур хьанвай агьа­лийриз недай-хъвадай суьрсет ва маса шейэр кIватIун патал малумарай мер­гьяматлувилин серенжемда иштиракна.

Къейд ийин хьи, а серенжемдин иштиракчийрин арада гьакI шегьердин 4 ва 21-нумрайрин юкьван мектебрин юнармейцийрин дестеярни авай.

Мярекатдин сергьятра аваз, абуру недай-хъвадай суьрсет, алукIдай парталар, хсуси ми­хьивал ийидай затIар, аялриз лазим шеэйр ва игрушкаяр кIватIна.

Донецкдай ва Луганскдай катуниз мажбур хьанвайбуруз куьмек гун патал Дагъустанда идалай виликни мергьяматлувилин са шумуд серенжем кьиле фена. Мисал яз, “Инсан” фондуни февралдин вацран эхирра Ростов шегьердиз куьч хьанвайбур патал 30 тонн недай-хъвадай суьрсет, 25 тонн хъвадай яд ва алукIдай парталрин, кIвачин къапарин 3 агъзур комплект рекье туна.

РФ-дин Президентдин СКФО-да авай Векилханадин Аппаратдин делилралди, Да­гъустан Донбассдай 600 кас кьабулиз гьазур я. Абурукай 200 кас патал республикадин меркезда вири шар­тIар тешкилнава.

Кьагьриман Ибрагьимов