Алатай йисан нетижайрал асаслу яз, Дагъустанда, 2020-йисав гекъигайла, къуьл гьасилун 6,5 процентдин гзаф хьанва. Идакай алатай гьафтеда Махачкъалада кьиле фейи республика яшайишдинни экономикадин жигьетдай вилик финин карда 2021-йисуз кьиле тухвай кIвалахрин нетижаяр кьуниз талукьарнавай совещанидал РД-дин хуьруьн майишатдин ва суьрсетдин министрдин везифаяр вахтуналди тамамарзавай Шарип Шарипова хабар гана.
“Алатай йисуз 450 тонн къуьл гьасилнава. 2020-йисав гекъигайла, и рекъем 6,5 процентдин хкаж хьанва”, — лагьана ада.
Ш.Шарипова гьакIни хабар гайивал, рази жедай нетижаяр дуьгуь гьасилунин хилени къазанмишнава. Дагъустанда тарихда сифте яз шаз 118,9 тонн дуьгуь кIватI хъувуна. И карда республикадин руководстводи мелиорациядин комплексдиз гузвай куьмекди кьетIен чка кьазва. Кьилди къачуртIа, эхиримжи пуд йисан къене мелиорациядин комплекс вилик тухуниз региондин бюджетдай 900 миллион манат пул чара авунва.
«Лезги газет»
