Эхиримжи йисара ракьун рекьиз чи республикадин гьукуматди кьетIен фикир гузва. Парар ва пассажирар тухунин кIвалах гегьеншарун ва мадни хатасуз авун патал Кеферпатан Кавказдин ракьун рекьерин ва республикадин кьиле авайбур саки гьар йисуз гуьруьшмиш жезва. Ихьтин гуьруьш цIини кьиле фена. 29 июндиз РД-дин кьилин везифаяр вахтуналди тамамарзавай Сергей Меликов Кеферпатан Кавказдин ракьун рекьерин цIийи начальник Сергей Задоринахъ галаз гуьруьшмиш хьана.
Мукьвара Дагъустанда Кеферпатан Кавказдин ракьун рекьерин югъ къейддайвал я. А чIавуз арадал къвезвай месэлайриз мадни дериндай килигдай мумкинвал жеда.
Ракьун рекьерин Махачкъаладин регионда гьам къенепатан, гьамни къецепатан алакъайра лазим тир вири чарар-цIарар гьазурзавай технологиядин къуллугъчийрин кIватIалдин пешекаррин кьиле акъвазнавай Эмиль Агъамован алакьунрилай гзаф крар аслу я.
1982-йисуз Махачкъалада юкьван школа акьалтIарай, кьурагьвидин хизанда чIехи хьайи Эмила, гьиниз кIелиз фейитIа хъсан жедатIа лугьуз, фикирарзавайла, адал къуншидал яшамиш жезвай, а вахтунда Махачкъаладин локомотиврин депода машиниствиле кIвалахзавай Николай Алчиев гьалтна. Адан меслят къиметлуди хьанай.
Эмила вичин зегьмет чIугунин рехъ локомотивар ремонтдай слесардин учениквиле кIвалахунилай гатIунна. Са йисуз кIвалахайдалай гуьгъуьниз кьве йисуз Советрин Армияда къуллугъна. 1985-йисалай 1989-йисалди депода электровоздин ва тепловоздин машинистдин куьмекчивиле кIвалахна. И вахтунда, кIвалах акъвазар тавуна, Ростовдин ракьун рекьерин университетдик экечIна, 2004-йисуз парар ва инсанар тухунин кIвалах идара авунин факультет хъсан къиметар аваз акьалтIарна.
Ракьун рекьин жегьил инженер ахпа вад йисуз Махачкъаладин отделенидин локомотиврин диспетчервиле, гуьгъуьнлай инженер-графиствиле ва отделдин технологвиле, гьакIни маса важиблу кIвалахрал хьана. Эхиримжи кIуьд йисуз 38-йисуз ракьун рекье кIвалахунин стаж авай Эмиль Агъаларовича технологиядин Махачкъаладин кIватIалдин кьиле аваз зегьмет чIугвазва.
Исятда, ракьун рекьерин карханайрилай ваъ, чи республикадин агьалийрилай аслу крар авани лагьана хабар кьурла, Эмиль Агъамова ихьтин жавабдалди зун гъавурда туна.
— Алай вахтунин четин месэлайрикай сад, Минеральный Воды станциядинни Дагъустандин арада йигиндиз фидай электропоездрин алакъадиз манийвалзавай кьилин татугайвал къайдайрал амал тийизвай водителар переездрилай яру сигналдиз килиг тавуна элячIун я. ИкI, алатай зур йисуз поездди пуд машин яна (бес Краснодардин, Ставрополдин вири переездарни гьа игьтинбур тушни?). Мад са месэла ам я хьи, ракьун рекьел кьилел кас алачиз ахъайнавай малар жезва (алатай зур йисан вахтунда поездди 120 мал яна).
Мукьвара, Махачкъаладин регион кьетIенвилелди хъсанарунин карда хьанвай агалкьунриз килигна, РФ-дин транспортдин министрдин къарардалди Эмиль стхадиз хурудал алкIурдай «Россиядин ракьун рекьерин гьуьрметлу работник» знак ганва.
Вахъ сагъламвал ва вири крара мадни агалкьунар хьурай, Эмиль стха!
Гьажиагъа Араблинский,
“Семафор” газетдин кьилин редактор
