Рамиз Сердерован — 60 йис
Вуж я Рамиз Сердеров? Гьар йисан эвел кьиляй, адет яз, 3-нумрада, чна “Лезги газет” кхьин патал зегьмет чIугур ва я чпин патай 10 ва адалай артух экземплярар патал пулдин такьатар серф авур ксариз тебрикар, разивилин хуш келимаяр рекье твазва. Абурун жергеда Рамиз Мирзегьасанович Сердерован, адан ими Насрудин Сердерович Мирзегьасанован тIварарни гьар йисуз тикрар жезва. Абурукай сад Махачкъаладин 10-нумрадин, муькуьди 12-нумрадин юкьван школайрин директорар я. Инал рикIел хкун кутугнава. Рамизан буба, рагьметлу Мирзегьасан Сердерович, Махачкъаладин ракьун рекьин станциядин вокзалдин начальниквиле кIвалахиз хьайи 1971-йисалай инихъ та вич рагьметдиз фидалдини, чи газетдин гьакьван гьуьрметлу ва лайихлу амадагрикай сад тир. Бубайрин ирс рухвайри давамарзава… Инал са кар мадни къейд ийиз кIанзава: Рамиз Мирзегьасановичан “хизандин тарце” 30 кас педагогар ава. Санлай абурун педагогвилин стаж 500 йисалай артух жезва!.. Гьихьтин делил!
И йикъара Рамиз Мирзегьасанович Сердерован 60 йис тамам жезва. 40 йис ада чи меркезда образованидин хел виликди тухуниз бахшнава. Идакайни 20 йисуз ада меркезда лап чIехибурукай сад тир 10-нумрадин юкьван школадиз регьбервалзава. Яни ам адетдин са муаллим, са предметдин сагьиб ваъ, вишелай виниз муаллимар, тербиячияр, агъзурдалай виниз аялар авай еке коллективдин сагьиб, тешкилатчи я. Алай аямди директордин хиве твазвай везифаяр гзаф я. Абурукай виридакай рахаз хьунни мумкин туш. Са кар рикIел хуьн: руководителдиз вири килигзавайди я. Идалайни гъейри, адан хиве неинки гьа школадин, школа авай райондин, гьакI санлай чи меркездин культура, аваданлувал, агьалийрин яшайишдинни асайишдин таъминвал, хизанрин мягькемвал хьтин ва хейлин маса месэлаяр гьялунин ва виликди тухунин везифаярни ава.
Заз Рамиз Мирзегьасановичан гьакъиндай ада кIвалахзавай школа авай магьалда яшамиш жезвай хейлин зи танишривай, мектебдиз фейила, муаллимривайни тарифдинни разивилин гзаф гафар ван хьана. Иллаки Дагъустандин халкьдин духтур, лезги кхьинрин зурба устад Азедин Мурадович Эсетованни адан уьмуьрдин юлдаш, рагьметлу Мафи Назировна Юзбеговадин гафарихъ инсан инанмишардай къуват ава. Абур гьа 10-нумрадин юкьван школадиз мукьва, Акаеван (виликан Тимирязеван) куьчеда яшамиш жезва. Рамиз Мирзегьасанович куьчедин са патай фидайла, муькуь пата бирдан аялар физ хьайитIа, абуру чпин кам явашарда, салам гана, ахпа рехъ давамарда. Бес мектебда, тарсуна, маса мярекатра ихьтин аялри гьихьтин низамлувал, гьуьрметлувал, къайгъударвал къалурзава!!!
Гьавиляй я 10-нумрадин юкьван школа меркезда тарифлуди, адан руководителдиз аялри хьиз, диде-бубайрини, шегьердин общественностдини гьуьрметзавайди.
Заз чидай делилралди, меркезда милли чIалар, сифте нубатда, лезги чIал ва литература чируниз, и школада хьиз, фикир гузвай, а кар хъсандиз тешкилнавай маса школа авач. Са вахтара меркездин 11, 14, 28-нумрайрин юкьван школайрикайни икI рахадай. Гила цIийиз кардик кутунвай 61-нумрадин школадани милли чIалар чирунин месэла тарифлудаказ гьялзава. Амма 10-нумрадин школадин тежриба кьетIенди я. Ина сифте яз милли чIаларал аялар патал махсус газетар акъудиз гатIунна. Гила аялринни жаванрин республикадин “Орленок” газет хьанва. 10-нумрадин юкьван школада милли чIаларай олимпиадаяр, маса мярекатар тешкилун адетдиз элкъвенва. И крариз школадин директорди къаюмвалзава. МасакIа ахьтин тешкиллувал бажагьат арадал къведай.
Рамиз Мирзегьасановичан къайгъударвал ва авторитет себеб яз, 10-нумрадин юкьван школадин мумкинвилер (классрин, кабинетрин, лабораторийрин кьадарар, абурун таъминвилин дережа) саки 2 сеферда артух хьанва! Гьа тегьерда аялрин спорт, классдилай къецяй жуьреба-жуьре пешеяр чирунин мумкинвилер, вахт-вахтунда чими ва тIямлу тIуьнар гунин шартIар виликди фенвайдини къейд авун кутугнава.
Рамиз Мирзегьасановича вичин чирвилерни датIана хкажзава. Ам тарихдин илимрин кандидат, илимдин рекьяй хейлин советрин член я. Гзаф месэлайрай адал жегьил муаллимар, гьакI алимарни, аспирантарни алукьзава, куьмекар къачузва.
Чна винидихъ 10-школа авай микрорайондин къулайвилерикай, агьалийрин яшайишдикай гаф куднай. Са вахтара а магьал къулайсуз куьчейринни мичIи кикIаринди тир. Гила къулайсуз са куьчени аквадач. Гьа тегьерда къацу зулар, тарарни кул-кусар кутунин, хуьнин месэлани кьилинди яз вилик ква. Зирзибилрикай хуьн, михьивал таъминарун сагъламвилин заминвал тирди ина, яшлубуру хьиз, аялрини гьиссзава. Ина чкIай будкаярни зирзибилри кьунвай кикIар саки аквадач. Мектеб и карда чешне тирдал шак алач.
Рамиз Мирзегьасановичан илимдинни педагогвилин, тешкилатчидин зегьмет гьуьрметдин хейлин тIварар, вини дережадин дипломар, тарифдин чарар, маса пишкешар, шабагьар гуналди къейднава. Гьа жергедай яз “Лезги газетдин” Гьуьрметдин грамотани ганва. “РФ-дин умуми образованидин Гьуьрметлу работник”, “РД-дин образованидин отличник” Рамиз Мирзегьасанович Сердероваз 60 йисан юбилей рикIин сидкьидай мубарак авуналди, чаз лугьуз кIанзава:
Мадни ачух, мадни адлу
Хьурай ви тIвар, дережаяр.
Гьар са велед хьурай бахтлу,
Мад кьакьан жез мертебаяр!..
Са алава: Рамиз Мирзегьасанович 1961-йисан 12-июлдиз Ашхабадда (дидедини бубади гьана кIвалахзавай) дидедиз хьана. 3-класс Ашхабадда, 10-класс Махачкъаладин 1-нумрадин юкьван школада гимишдин медаль къачуналди, 1983-йисуз ДГУ-дин тарихдин факультет яру диплом къачуналди куьтягьна. Адалай кьулухъ вичи кIелай 1-нумрадин юкьван школадин муаллимвиле, завучвиле кIвалахна. 2000-йисалай инихъ — 10-нумрадин школадин директор я.
2006-йисуз тарихдин илимрин кандидатвилин дережа хвена…
Мердали Жалилов,
РФ-дин ва РД-дин культурадин лайихлу работник
