Духтурар герекзава

“Земский доктор” программа кьилиз акъудунин сергьятра аваз СтIал Сулейманан райондин азарханади жегьил духтурриз­ кIвалах теклифзава. Кьилди къачуртIа, азарханадиз ихьтин духтурар герекзава: оториноларинголог, ревматолог, аялрин офтальмолог, психиатр, кардиолог, эндокринолог, фтизиатр, акушер-ги­неколог, ультразвуковой диагностикадин духтур, педиатр, анес­тезиолог-реаниматолог, хирург, терапевт, дерматовенеролог, инфекционист, аялрин хирург.

Къейд ийин хьи, “Земский доктор” программада иштиракзавай пешекарар хуьруьн чкадиз куьч хьана кIанзава. Адан сергьят­ра­ аваз духтурриз  — 1 миллион, фельдшерриз 500 агъзур манат­ пул­ гузва. Медицинадин къуллугъчиди хуьруьн чкада 5 йисалай­ тIимил­­­ тушиз кIвалахун шартI я. Программадин кьилин макьсад хуьруьн чкайра авай азарханаяр бес кьадар духтурралди таъминарун я.

Рапар язава

31-январдиз Кьурагь райондин администрациядин дараматда муниципалитетдин кьил Замир Азизован регьбервилик кваз кьиле фейи совещанидал райондин азарханадин кьилин духтур Азим Азимова коронавирусдихъ галаз алакъалу гьаларикай доклад авуна. Адан гафарай малум хьайивал, 31-январдин делилралди, районда коронавирус акатнавай 13 кас духтуррин гуьзчиви­лик кваз кIвалин шартIара сагъар хъийизва. СтIалжем хьанвай 6 дуьшуьш винел акъуднава. Алай вахтунда райондин азарханадин­ садакай масадак акатдай азаррин  отделенида начагъ са кас ава.

А.Азимова гьакIни къейд авурвал, агьалийриз коронавирусдиз акси рапар ягъун патал духтуррикай ибарат тир бригадаяр райондин хуьрериз физва. Алатай гьафтеда бригададин куьмекдалди КIирида — 22, КьепIирдал 17 касдиз ковиддиз акси ра­пар яна.

Эвер гана

Докъузпара райондин азарханадин кьилин духтур Шагьлар Бухсаева коронавирусдин вилик пад кьун патал агьалийриз ра­пар­ ягъуниз эвер гана. Вичин рахунра ада къейд авурвал, эхиримжи йикъара районда коронавирусдик начагъбурун кьадар гзаф жез гатIуннава. Асул гьисабдай абурун чIехи пай жегьилар ва аялар я.

РикIел хкин, Докъузпара район, коронавирусдиз акси рапар янавайбурун кьадардал гьалтайла, республикада сифтегьан пуд муниципалитетдин жергеда ава: 1-чкадал — Хив, 2-чкадал — До­къуз­пара ва 3-чкадал Гуьмбет районар ала.

Ш.Бухсаева къейд авурвал, рапар янавайбурун арада коронавирусдик начагъ жезвайбурун кьадар тIимил я. Раб янавайдак азар акатайла, начагъвал кьезил гьалда алатзава.

Чи мухбир