Гзаф хьанва

Дагъустанда 8-16 йисарин яшара авай аялар текдиз тербияламишзавай диде-бубайриз (одинокие родители) ва тIимил къазанжи къвезвай кIвачерал залан дишегьлийриз гузвай пособийрин кьадар хкаж хьанва.

“Лезги газетдиз” республикадин Пенсийрин фондунин пресс-къуллугъди хабар гайи­вал, и кар яшамиш хьун патал герек пулунин регионда тайинарнавай агъа кIанин кьадар (прожиточный минимум, 2022-йисуз  —  11515 манат) гзаф хьунихъ галаз алакъалу я.

Гила аялар текдиз тербияламишзавай диде-бубайриз вацра гьар са аялдин кьилиз —  5 749, 50 манат, кIвачерал залан дишегьлийриз 6 275, 50 манат гуда.

Къейд ийин хьи, алай вахтунда республикада тек диде-бубайриз гузвай пособие 29 агъзур, кIвачерал залан дишегьлийриз талукь пособие 5650 касди къачузва.

Дидевилин капитал

Урусатда алай йисан 1-февралдилай ди­девилин капиталдин кьадар гзаф хьанва.

Сад лагьай аял хьайила гузвай пулунин кьадар гила 524 агъзурни 500 манатдиз барабар я. Эгер сад лагьай аял хьайила хизанди дидевилин капитал къачуначтIа, кьвед лагьай аял хьайила ахьтин хизандиз къвезвай капиталдин кьадарди 693 агъзурни 100 манат тешкилда.

Эгер хизанди сад лагьай аял хьайила дидевилин капитал къачунатIа, кьвед лагьай­ аял хьайила ахьтин хизандиз государстводи 168 агъзурни 600 манат гуда.

РикIел хкин, алай йисан 1-февралдалди сад лагьай аял хьайила гузвай дидевилин капиталдин кьадар — 483 агъзурни 800, кьвед лагьай аял хьайила — 639 агъзурни 400 манат (эгер сад лагьай аял хьайила капитал къачу­начтIа) тир.

Аялриз талукь пособияр

Дидедиз аял хьайила ва я хвавиле, рушвиле кьабулайла гузвай пособидин кьадарни 1-февралдилай артух хьанва — 20 агъзурни 472 манат (виликдай — 18 агъзурни 886 манат).

Пособие диде-бубадикай садавай ва я къаюмдивай къачуз жеда. КIвалахдик квай ди­де-бубайриз пособие кIвалахзавай чкадай ча­ра ийизва (яшайишдин страхованидин фонду­нин такьатрин гьисабдай). Бейкарриз ва я очни­даказ кIелзавайбуруз — чеб регистрация авунвай чкада (хуьре, шегьерда) авай агьалийриз яшайишдин рекьяй къуллугъдай органрай. Кьвед лагьай дуьшуьшда пулдин такьатар федеральный бюджетдай чара ийизва.

Къейд ийин хьи, аскервилин къуллугъдал эверзавайдан уьмуьрдин юлдашдиз гузвай пособие — 32 агъзурни 420 манатдиз, аялдин йисни зур тамам жедалди гьар вацра гузвайди — 7 агъзурни 677 манатдиз, аскервилин къуллугъдал эвернавайдан аялдин пуд йис тамам жедалди гьар вацра гузвайди — 13 агъзурни 894 манатдиз, набут ва я яш 7 йисалай гзаф тир аял хвавиле, рушвиле кьабулайла са сеферда гузвайди 156 агъзурни 428 манатдиз  барабар  хьанва.

Пенсийрикай

Февралдин вацра кIвалахдик квачир пенсионеррин пенсия мад сеферда артухар хъийидайвал я.

РикIел хкин, январдин вацра абурун пенсия 5,9 процентдин хкаж хъувунай. Амма ЦIийи йисан суварихъ галаз алакъалу ял ядай йикъарилай кьулухъ уьлкведин Президент Владимир Путина бейкар пенсионерриз гузвай пенсия мадни хкаж хъувунин теклиф гана.

Гьа икI, абурун пенсия февралдин вацра 2,7 процентдин мадни хкаж хъжеда.

«Лезги газет»