Бахча эцигзава
СтIал Сулейманан райондин ДаркIуш-Къазмайрин хуьре 100 чка авай аялрин бахча эцигзава. Ам алай йисан эхирра ишлемишиз вахкудайвал я.
Мукьвара райондин кьил Нариман Абдулмуталибова сейсмологиядин хатасузвилин жигьетдай кардик квай республикадин центрадин директор Расим Сулеймановахъ галаз бахчадин кьве гьавадикай ибарат дарамат эцигзавай гьал ахтармишна. Эцигунрин кIвалахар республикадин инвестицийрин программадин сергьятра аваз тамамарзава.
Нариман Абдулмуталибова къейд авурвал, республикадин чIехи муниципалитетрикай сад тир СтIал Сулейманан районда мектебдиз фидалди яшара авай аялар патал образованидин идараяр бес кьадар авач. Тек са ДаркIуш-Къазмайрин хуьре цIийи бахча ахъаюн вилив хуьзвай аялрин кьадар 400-дав агакьзава. Яшайишдин къурулушдин объектар авачирвиляй гзаф кьадар жегьил хизанар райондилай къецепата яшамиш жезва.
“Чи макьсад райондин вири хуьрера аялрин бахчаяр эцигун я. И месэладиз талукь ва администрацияди кьабулзавай серенжемар себеб яз, муниципалитетда йисан эхирралди 14 лагьай бахча пайда жеда”, — лагьана райондин кьили.
Игьтияж ава
Мегьарамдхуьруьн райондин са шумуд хуьр целди таъминарзавай “Чепелар-Гилияр-Къуйсун-Мегьарамдхуьр-Гъепцегь” турбадал (водовод) декабрдин, январдин варцара са шумуд авария арадал атана. Идакай райондин администрациядин пресс-къуллугъди хабар гузва.
13-январдиз муниципалитетдин ЖКХ-дин бригадади нубатдин авариядин нетижаяр арадай акъудна акьалтIарна.
Лагьана кIанда, ихтилат физвай цин турба фадлай куьгьне хьанва. Алатай йисан декабрдин вацра, Дагъустандин Кьил Сергей Меликова гайи тапшуругърин сергьятра аваз, Гилийрин хуьруьн мулкарилай физвай участокда 300 метрдин мензилда куьгьнебур цIийи турбайралди эвезна. Амма мукьвал-мукьвал жезвай аварийри къалурзавайвал, турбаяр дегишарна кIанзавай чкаяр мадни ава.
Райондин администрациядин пресс-къуллугъди хабар гузвайвал, и месэла республикадин, РД-дин энергетикадин ва ЖКХ-дин, райондин администрациядин гуьзчивилик ква.
«Лезги газет»
