13-январдиз, Россиядин печатдин юкъуз, Росгвардиядин Дагъустан Республикада авай Управленидин начальникдин СМИ-рихъ галаз алакъаяр хуьнин рекьяй куьмекчи, полициядин полковник Константин Шиян ва мад кьве къуллугъчи республикадин газетрин, интернет-изданийрин ва “Дагъустан” РИА-дин журналистрихъ галаз гуьруьшмиш хьана, абуруз пешекарвилин сувар тебрикна.
Гуьруьшдин вахтунда Управленидин ва республикадин милли газетрин редакцийрин арада инлай кьулухъ алакъаяр мадни мягькемарунин месэлаяр веревирдна. Росгвардиядин векилди СМИ-ра зегьмет чIугвазвайбуруз ведомстводи регионда алай йисуз кьиле тухун пландик квай зурба мярекатрикай суьгьбетна, журналистриз анра иштиракунин теклиф гана.
Офицерди Росгвардиядин РД-да авай Управленидин кьиле авай ксар республикадин СМИ-рин векилрихъ галаз рафтарвал ийиз гьамиша гьазур тирди, территориальный органдин ва республикадин СМИ-рин векилрин арада авай ихтибарвал къалурунин алакъайриз еке къимет гузвайди къейдна.
— Умудлу я, чна инлай кьулухъни, арада авай ихтибарлувал квадар тавуна, ачухдаказ, бегьерлудаказ саналди кIвалахда. Квехъ чандин сагъвал, хушбахтлувал, яратмишунин рекье мадни еке къуватар хьурай! — алхишна К.Шияна, журналистрив шабагьар вахкудайла.
ИкI, виниз тир пешекарвал къалурунай, Росгвардиядин РД-да авай Управленидин подразделенийрин къуллугъдинни женгинин кIвалахдикай региондин агьалияр хабардар авунай ва пешекарвилин суварихъ галаз алакъалу яз “Лезги газетдин” редакциядив ва и цIарарин автордивни Управленидин начальникдин везифаяр вахтуналди тамамарзавай Г.М.Котован къулар алай чухсагъулдин чарар вахкана.
Рагнеда Рамалданова
