Алай йисан 22-январдиз Мегьарамдхуьре, Советрин Союздин Игит Абас Исрафилован тIварунихъ галай 1-нумрадин ДЮСШ-да, райондин 80 йисан юбилейдиз бахшна, дзюдодай 15 йисал къведалди яшда авай жаванрин арада кIвенкIвечивал патал акъажунар кьиле фена.
Райадминистрациядин физический культурадин ва спортдин отделдин малуматда хабар ганвайвал, ана 60 спортсменди иштиракна. Спортдин серенжемдин макьсад жаванрин арадай бажарагълубур хкягъун, спортсменрин устадвал хкажун ва районда дзюдо машгьурун тир.
Райондин кьил Фарид Агьмедова къейдзавайвал, кьилин везифа районда санлай спорт машгьурун ва акьалтзавай несил ватанпересвилин руьгьдаллаз тербияламишун я.
Турнир райадминистрациядин винидихъ тIвар кьунвай отделди образованидин управленидихъ галаз санал тешкилна.
Чи мухбир
