И йикъара Сулейман-Стальский райондин Курхуьруьн 1-нумрадин мектебда «Дагъустандин йисан муаллим-2019» конкурсдин муниципальный пай кьиле фена. И гьакъиндай «Лезги газетдиз» райадминистрациядин пресс-къуллугъди хабар гузва.

Бажарагълу муаллимар винел акъудунин, абуруз куьмек гунин ва лап хъсан муаллимрин тежриба раижунин макьсаддалди гьар йисуз кьиле тухузвай конкурс «Методический семинар» ва «Лап хъсан тарс» паярикай ибарат я. И йисуз муниципальный паюна райондин цIуд муаллимди чпин алакьунар къалурна.

Конкурсдин нетижада Кьасумхуьруьн 1-нумрадин мектебдин химиядин муаллим Беневша Аликберова гъалиб хьана. 2-чка Курхуьруьн 2-нумрадин мектебдин урус чIаланни литературадин муаллим Альфия Гьажиевади куьна; 3-чка Герейханов хуьруьн 2-нумрадин мектебдин урус чIаланни литературадин муаллим Амаля Гьасановади, ЦIийихуьруьн мектебдин математикадин муаллим Эмалия Мирзоевади ва ЦицIигърин мектебдин ингилис чIалан муаллим пери Магьмудовади кьуна.

Муниципальный паюна гъалиб хьайи Беневша Аликберовади 19-20-декабрдиз Дербент шегьерда кьиле фидай конкурсдин зонадин паюна иштиракда.

«Лезги газет»