Алай йисан гьеле 16-августдиз РД-дин Гькуматдин ва “Сбербанк” ПАО-дин регьберри республикада “Нагъд пул галачир Дагъустан” проект уьмуьрдиз куьчуьрмишиз башламишунихъ галаз алакъалу “рекьерин картадал” къулар чIугунай. Проектдин тIварцIяй гъавурда гьатзавайвал, ам Дагъустандин мулкунал гьам образованидин ва медицинадин, гьамни транспортдин рекьера ийизвай саки вири гьахъ-гьисабар нагъд пул ишлемиш тийидай къайдада тамамарунихъ галаз алакъалу я.
Проектдин сергьятра аваз, 26-ноябрдиз Дагъустан Республикадин МФЦ-да чпин куьмекдалди госпошлина нагъд пул галачиз гудай мумкинвал ачухзавай цIийи тадаракрихъ — pos-терминалрихъ — галаз танишарунин мярекат кьиле фена. Ам прессадин векилрихъ галаз гуьруьшдилай башламиш хьана. Журналистрин суалриз “Сбербанк” ПАО-дин Дагъустандин отделение идара ийизвай Дмитрий Артемова, РД-дин Гьукуматдин Председателдин Сад лагьай заместитель Гьажимегьамед Гьуьсейнова ва МФЦ-дин директор Мегьамедэмин Арсланалиева жавабар гана.
Малум хьайивал, алай вахтунда цIийи жуьредин терминалар Дагъустандин МФЦ-дин 5 офисда — Махачкъалада Насрутдинован ва Хизроеван, Каспийскда — Орджоникидзедин, Хасавюртда — Даибован ва Дербентда Дагъустандин стрелковый дивизиядин тIварарихъ галай куьчейра авай центрайра хьун тайинарнава.
Терминалрин куьмекдалди нагъд пул галачиз гила Россиядин МВД-дин (паспортар, водителвилин шагьадатнамаяр къачудайла ва дегишардайла, транспортдин такьат гьалдай ихтияр къачун патал имтигьан тухудайла), ФНС-дин (кьилдин карчи яз регистрация ийидайла къачузвай пошлина гудайла), Росреестрдин (кадастрдин гьисабда эцигдайла ва юзан тийизвай эменнидин иесивилин ихтиярар тайинардайла, ЕГРН-дай делилар къачудайла ийизвай къуллугърай) адресриз пошлина рекье твадайла, ЖКХ-дин, алакъадин, интернетдин къуллугърай пул гудайла, образованидихъ галаз алакъалу гьахъ-гьисабар ийиз жеда.
“Дагъустандин агьалийривай гила, МФЦ-дин “пенжердивай” къекъечI тавуна, жуьреба-жуьре къуллугърай гана кIанзавай пулар банкунин картадин куьмекдалди ва я нагъд пулунихъ галаз алакъалу тушир маса къайдада агакьариз, центрайрин пешекарривай Сбербанкдин терминалрин куьмекдалди гана кIанзавай пул кьабулиз жеда. Муьштеридин вахт чи виридалайни къиметлу ресурс я. Чна муьштеридиз фад ва къулайдаказ къуллугъ авун патал вири къуватар желбда”, — къейдна Дмитрий Артемова.
“И проектдин бинеда нагъд пул арада авачиз гьахъ-гьисабар авунихъ галаз алакъалу кIвалах тешкилун, санай-масаниз финансар физвай рекьер “алцифбур” хьун таъминарун ава. Дагъустандин вири шегьерра ва районра чна пул гунин ихьтин къайдаяр кардик кутунин кIвалах кьиле тухузва. Сбербанкди лагьайтIа, чаз и карда методологиядин ва технологиядин жигьетдай куьмек гузва”, — малумарна Сад лагьай вице-премьерди.
Гьажимегьамед Гьуьсейнова “Къайгъу” тIвар ганвай проект гъиле кьунвайдакайни лагьана. Адан бинеда пенсионерриз яшайишдин картаяр гун ава. Ихьтин картайри абуруз, кIандай шей маса къачуз туьквенриз фейила, кьезилвилерикай менфят къачудай мумкинвал гуда.
“Ихьтин картаяр акъудунин кIвалах башламишнава, алай вахтунда банкуни 982 карта акъуднава. Проектдик лагьайтIа, 3 амадаг экечIнава: “Яшайишдин аптека” ООО, “Агат” ООО ва “Фирма АС” ООО. Инлай кьулухъ амадагрин кьадар хейлин артух жеда”, — къейдна ада.
Итижлу ва гегьенш майданра кьилиз акъудна кIанзавай проектрикай сад “Нагъд пул галачир транспорт” я. Алай вахтунда пассажирар санай-масаниз тухузвай са карханадихъ галаз икьрар кутIуннава, нагъд пул галачиз гьахъ-гьисаб ийидай терминалралди таъмин тир 1 маршрутни кардик кутунва. 2019-йисан 1-июль алукьдалди, Махачкъаладин гзаф пассажирар тухудай транспортдин 80 процентдив агакьна такьатар pos-терминалралди тадаракламишдайвал я, хабар гана Гь.Гьуьсейнова.
Мегьамедэмин Арсланалиеван гафаралди, pos-терминалар кардик кутунин нетижада центрадиз атай касдин къуллугъ тамамарунин кIвалах са кьадардин кьезил ва, кьилинди, МФЦ-дихъ галаз рафтарвалдай вахт куьруь жеда. “Зи документар” центрайрин кIвалахдин бинеда авай “са пенжердин” къайда мад са ерилу къуллугъдалди алава хъхьанва: гила, къуллугъдин патахъай арза кхьинилай башламишна, ам тамамарна куьтягьдалди вири гьерекатар МФЦ-дин пешекаррин жавабдарвилик жеда”, — алава хъувуна ада.
Ихьтин рахунрилай кьулухъ кIватI хьанвайбур цIийи терминалрин кIвалахдихъ галаз таниш хьана.
Жасмина Саидова
