15-августдиз республикадин газетар чапдай акъудзавай чIавуз кIвалахзавай чкадал «Издательство «Лотос» ООО-дин газетрин производстводин цехдин начальник Расул Мегьамедович Дибирмегьамедов рагьметдиз фена.
Р.М. Дибирмегьамедова Дагъустандин кьилин газетар, журналар акъудзавай чапханада фадлай кIвалахзавай. Республикадин печатдин саки вири изданияр гьар гьафтеда адан гуьзчивилик кваз акъатзавай.
Р.М. Дибирмегьамедов кар алакьдай тешкилатчи, вичихъ галаз санал кIвалахзавай юлдашрин арада еке гьуьрмет авай дуст тир. Ам республикадин газетрин кьилин редакторрихъ галаз алакъада авай, газетар чапдай акъудзавай чIавуз арадал къвезвай бязи месэлаяр ада, редакцийриз хабар гана, чкадал гьялдай.
«Издательство «Лотос» ООО-дин коллективди, Расул Мегьамедович Дибирмегьамедов рагьметдиз финихъ галаз алакъалу яз, адан хизанриз, вири мукьва-кьилийриз, дериндай хажалат чIугунивди, башсагълугъвал гузва. Адан экуь къамат санал кIвалахай юлдашрин рикIерай садрани акъатдач. Расул Дибирмегьамедован тIвар «Лотос» чапханадинни газетрин редакцийрин тарихда амукьда.
* * *
«Лезги газетдин» редакциядин коллективдини, Расул Мегьамедович Дибирмегьамедов рагьметдиз финихъ галаз алакъалу яз, адан хизанриз, вири мукьва-кьилийриз башсагълугъвал гузва.
