Махачкъаладин агьали Мегьамед Исмаилова СтIал Сулейманан районда уьлкведин Яракьлу Къуватрин жергейра къуллугъун патал икьрар кутIуннава. Жегьилдихъ военный рекьяй пешекарвал авачтIани, рикIевай ватанпересвилин гьиссери адак Ватан хуьнин карда руьгь кутуна.
Яракьлу Къуватрин жергейриз къуллугъ ийиз ракъурдалди вилик вахкай имтигьанра М. Исмаилова хъсан алакьунар къалурна. Кьилин образование авай гележегдин аскер мотострелковый дивизиядин взводдин отделенидин оператор яз тайинардайвал я.
Мукьвара СтIал Сулейманан райондин кьилин заместитель Абуталиб Фатулаева М. Исмаиловахъ галаз гуьруьш кьиле тухвана. Жавабдар къуллугъ хкягъунай райондин кьили адаз сагърай лагьана ва Ватан хуьнин карда гьар са аскердин гьунаррихъ еке метлеб авайди къейдна.
Икьрардин бинедаллаз къуллугъ ийиз гьазур хьанвай ватанэгьлидиз пулдин куьмекни ганва. ИкI, А. Фатулаева М. Исмаиловав мергьяматлувилин «Умуд» фондунин патай 100 агъзур манат пул вахкана. Гьа и кьадарда аваз адаз гьакIни СтIал Сулейманан райондин администрациядин патайни чара ийида. Идалайни гъейри, икьрардин бинедаллаз къуллугъзавай гьар са аскердив хьиз, М. Исмаиловавни федеральный бюджетдай — 400, республикадин бюджетдай 500 агъзур манатдин кьадарда аваз пулдин такьатар агакьда.
Чи мухбир
