Дагъустан Республикадин Гьукуматдин Председатель Абдулпатагь Амирханова Дагъустандин школьникриз премияр гунин гьакъиндай буйругъдал къул чIугуна. Документ республикадин гьукуматдин сайтда эцигнава.
ИкI, Дагъустан Республикадин школайра кIелзавай ва Вирироссиядин олимпиададин эхиримжи паюна агалкьунар хьайи школьникриз, абур гьазурай муаллимриз 100 агъзур манатдин кьадарда аваз премия гуда. ГьакIни икьван премия Дагъустан Республикадин школайра 11-классда кIелай ва школьникрин олимпиадайрин сад лагьай дережада гъалибвилин тIварар къачурбурузни гуда.
Буйругъдал асаслу яз, 100 агъзур манатдин кьадарда аваз пулунин пишкешар государстводин эхиримжи аттестациядин нетижайрай 100 балл къачур 11-классда кIелайбурувни агакьда.
ЕГЭ 100 баллдалди вахкай ученикриз, Вирироссиядин чIехи олимпиадайра ва федеральный образованидин проектра гъалиб хьайибуруз, призерриз премия гунин гьакъиндай алай йисан июлдиз РД-дин Кьил Сергей Меликова малумарнай.
«Лезги газет»
