Дербентдин педагогвилин колледжда “Дин ва алай девир” лишандик кваз кьиле фейи мярекатда гьукумдин органрин, общественный ва динрин тешкилатрин, массовый информациядин такьатрин векилри иштиракна.
Тебрикдин гаф анал РД-дин милли сиясатдин ва динрин крарай рекьяй министр Энрик Муслимов рахана. “Вичин ихтиярарни буржи чизвай гьар са касдивай, гьихьтин гьалариз аватайтlани, обществода вичин уьмуьр дуьз къайдада тухуз жеда”, — къейдна ада.
Анал докладар Махачкъаладин епархиядин урусрин хашпарадин килисадин векил Ийеромонах Иоана, Дербент шегьердин имамрин председатель Абдулла Маликова, Дербентдин коррупциядихъ галаз женг тухузвай общественный комиссиядин векил Расул Гьажимусаева, дуьньядин культурайрин ва динрин тарихдин музейдин директор Диана Гьасановади, общественный предметрин муаллим Мидахад Алиева, Кеферпатан Кавказда авай ЮНЕСКО-дин кафедрадин отделенидин заведующий Гуьлчохра Саидовади авуна.
Саки вирибурун фикир сад тир: чи гьар йикъан яшайишдиз динди таъсирзава. Дин чи уьмуьрдин къакъудиз тежер са пай я. Ада эдеб, ахлакь мягькемарзава.
Диндихъ инанмишвал — им эвелни-эвел, уьмуьрдин гьихьтин шартIара хьайитIани, инсан яз амукьун, жув амайбуруз чешне хьун я.
Къагьриман Ибрагьимов
