Виридуьньядин здравоохраненидин пешекарри къейдзавайвал, анжах коронавирусдиз акси рапар ягъунилай ва коллективный иммунитет арадал атунилай алай вахтунда инсаниятдин уьмуьр ва сагъламвал хаталувилик кутунвай тIугъвал акъвазариз алакьда. Эхиримжи йикъара дуьньяда коронавирусдин цIийи “Омикрон” штамм пайда хьуни азардиз акси рапар ягъунин лазимвал мадни артухарнава. Идахъ галаз алакъалу яз регионра веревирд авурдалай кьулухъ РФ-дин Госдумади сад лагьай сефердин кIелунра “Агьалийрин санитариядинни эпидемиологиядин гьалар хъсанарунин гьакъиндай” ФЗ-да дегишвилер тун” закон кьабулнава. Идакай Дагъустандин здравоохраненидин сайтда хабар гузва.
Кьабулун лазим тир закон 2022-йисан 1-июндалди, яни зур йисуз кардик жеда. Ахпа, эгер тIугъвал акъвазариз алакьайтIа, адан лазимвал амукьдач.
Инал лугьун лазим я хьи, Россиядин Конституцияди истемишзавайвал, и жуьредин законар уьлкведа кьетIен гьалар арадал атун мумкин тирла кьабулзавайди я. Коронавирусдихъ галаз алакъалу гьалар пайгардик акат тавуниз килигна кьабулзавай мажбури закон гьеле къуватда гьатнавач. Ам Федеральный Собранидин агъа палатада кьвед лагьай сеферда кIелун, Федерациядин Советда веревирд авун лазим я. Ахпа, Конституцияда къалурнавайвал, уьлкведин Президентдал къул чIугун патал агакьда. И цIийивили чи уьмуьрдиз гьикI таъсирдатIа, гъавурда тван…
Закондин кьилин везифа РФ-дин агьалияр тIугъвалдикай хуьн, ам арадал атанвай чIуру гьаларихъ галаз женг чIугун патал мажбури серенжем я. Идахъ галаз алакъалу яз законда цIийи термин — “сагъламвилин сертификат” гьатда. Вице-премьер Татьяна Голиковадин гафаралди, документдиз ихьтин тIвар гуни адан макьсад дуьз тайинарзава, инсанрик къурху кутур QR-кодрикай законда гафни авач.
Закон кьабулайтIа, кардик акатдай цIийи жуьредин сертификатар неинки коронавирусдиз акси раб ягъай, гьакIни беденда антителаяр авай вири агьалийривай къачуз жеда. Инал антителаяр гьикI арадал атанатIа (азардиз акси раб яна, азарлу хьана…), гьатта азардиз акси яз къецепатан уьлквейрин вакцина ишлемишнаватIани ва я азардин лишанар авачиз абур беденда пайда хьанватIани, важиблу туш. Кьилинди, инсандин беденда антителаяр ава — сагъламвилин сертификат гузва.
Инал мадни рикIел хкиз кIанзава: дуьньяда пайда хьайи залан вири азаррикай (цIегьер, ярар, полиомиелит, столбняк ва мсб.) инсаният анжах абуруз акси рапар ягъуналди хуьз алакьна. Идахъ галаз алакъалу яз сагъламвилин сертификатни чун патал цIийивал туш — аял ва жаван чIавуз азарриз акси рапар ягъунин гьакъиндай документ чахъ гьар садахъ ава.
Рагнеда Рамалданова
