Россиядин мектебрин 8-11-классра кIелзавайбуруз ва колледжрин студентриз «Гележегдин код» проектдин сергьятра аваз программированидин чIалар пулсуздаказ чирдай мумкинвал ава. КIелунин 2023-2024-йис патал «Госкъуллугъар» порталда арзаяр кьабулунив эгечIнава.
Къейдзавайвал, гьавая курсара Python, Java, C++, C#, 1С, Iua, SQI, JavaScript ва маса чIалар чириз жеда. Курсар са шумуд дережадинбур ава: сифтегьанбур, базадинбур, вилик фенвайбуруз талукьбур.
Чирвилер кIелунин 4 модулдикай, 144 академиядин сятиникай ибарат я. 150-далай артух тир курсарикай жуван рикIиз хушди хкягъиз жезва. Чирвилер гьам онлайн, гьам офлайн къайдайра гузва. Жув яшамиш жезвай регионда очный къайдадин тарсар кьиле физвани-физвачни «Госкъуллугъар» порталдин интерактивный картадин куьмекдалди чириз жеда.
Программада иштиракун патал арза вугудай къайда, ихьтинди я:
чирвилер къачунин курсунин къайда хкягъа; арза школьникдивай, студентдивай, диде-бубадивай ва я векилдивай вугуз жеда;
гьахьун патал синагъ авунин ссылка вилив хуьх, адет яз, ам арза ахтармишайдалай кьулухъ хсуси кабинетдиз хквезва;
ссылка агакьай макъамдилай 10 йикъан къене гьахьунин синагъ (имтигьан) кьилиз акъуд;
образованидин тешкилатдихъ галаз пулсуздаказ чирвилер къачунин жигьетдай икьрар кутIуна.
Нетижайрин имтигьанар агалкьунралди вахкуналди, школьникри ва колледжрин студентри курс акьалтIарунин гьакъиндай шагьадатнама къачуда.
Арзаяр 30-сентябрдалди вугуз жеда.
Чи мухбир
