РФ-дин илимдин ва высший образованидин министерстводи хабар гузвайвал, алай вахтунда Россиядин вузра дяведин махсус серенжемдин (СВО) иштиракчияр ва я абурун хизанрай тир 35 агъзур касди чирвилер къачузва. Пулдихъ кIелзавай къайдадилай пулсуздал абурукай 800 касдилай гзафбур элячIнава.
«Алай вахтунда, кьабулдай кампаниядин нетижайралди, СВО-дин 1,2 агъзур иштиракчи ва 8,1 агъзур кас абурун хизанрин членар экечIнава. Пулсуз къайдадал дяведин махсус серенжемда иштиракзавай 448 кас ва абурун багърийрикай (хизанрай) тир 420 студент элячIнава. Санлай къачурла, уьлкведин вузра СВО-да къуллугъзавай 12 855 касди ва абурун хизанрай тир 21 643 студентди чирвилер къачузва», — хабар гана илимдин ва высший образованидин министрдин заместитель Константин Могилевскийди.
Июлдин вацра министрдин заместитель Дмитрий Афанасьева 2023-йисуз СВО-дин иштиракчияр ва абурун веледар патал квотадай уьлкведин вузрик тахминан 7 агъзур абитуриент экечIнавайдакай хабар ганай. Сентябрдиз лагьайтIа, и квотадай кьабулнавай студентрин кьадар 8,5 агъзурдалай гзаф тирдакай малум хьана. Санлай къачурла, 2023-йисуз университетриз бюджетдин гьисабдай тир 626 278 чка чара авунва.
Инал рикIел хкин, вузриз кьабулунин кампаниядин вахтунда илимдин ва высший образованидин министерстводи СВО-да иштиракунай абитуриентриз алава тир 10 балл хгун теклифнай. Абур ЕГЭ-дин нетижайрал эхцигзавай. Алава тир баллар вузри абитуриентриз кьетIен агалкьунрай гузвай. Месела, спортда гъалиб хьунай ва я волонтервилин кIвалахдай. Гила ихьтин баллар къачунин бине СВО-да иштиракунни хьанва – гьам военный, гьам гуьгьуьллуди яз. Санлай къачурла, абур 10-далай гзаф хьун лазим туш.
Женгинин гьерекатрин статус авай ва бюджетдин гьисабдай кIелзавай студентривай государстводин социальный стипендияни къачуз жезва. Абуруз ийизвай маса кьезилвилерик акатзава: материальный куьмек гун, кIелунин къимет агъузарун, икьрардин бинедаллаз кIелзавайбуруз пул гудай вахт яргъалди вегьин, общежитида чка гун ва и кардин къимет агъузарун (ва я тамамдаказ азад авун) ва икI мад.
Чи мухбир
